Mańǵystaý oblysy men Qyzylorda oblysynyń Aral aýdanynda jaýyn-shashynnyń joqtyǵynan qurǵaqshylyq baıqalýda, dep habarlaıdy Egemen.kz.
QR Aýyl sharýashylyǵy mınıstrligi baspasóz qyzmetiniń málimetinshe, Mańǵystaý oblysynyń turǵyndary úshin jem-shóptiń qoljetimdiligin qamtamasyz etý maqsatynda respýblıkanyń basqa óńirlerinen jem-shóp satyp alý júzege asyrylýda. Sońǵy eki aptada 13 myń baý jáne 92 oram shóp ákelindi. Apta saıyn Qostanaı oblysynan 5 kebek vagony jetkiziledi.
Jazǵy mal jaıýdy Beıneý jáne Qaraqııa aýdandaryna tasymaldaý júzege asyrylady. Sondaı-aq, Aqtóbe, Soltústik Qazaqstan, Atyraý oblystarynyń aýmaǵyna jazǵy mal jaıý úshin 2260 bas jylqy, 3000 bas qoı, 200 túıe jáne 1010 bas iri qara mal tasymaldandy.
Jergilikti fermerlik sharýashylyqtar Aqtóbe jáne Atyraý oblystarynyń aýmaǵyndaǵy shóptiń shabylýyn uıymdastyrady. Sondaı-aq, Aqtóbe oblysynyń fermerlik sharýashylyqtarynyń óńirge shóp jetkizý kestesi bekitildi. Shóp satyp alý «Kaspıı» ÁKK 204 mıllıon teńge somasynda bólingen qarajat esebinen júzege asyrylady.
Azyq-túlik kelisimshart korporasııasy 637 tonna arpany naryqtyq baǵadan 17%-ǵa tómen baǵamen satty. Búginde 573 tonna arpa jetkizildi. Buǵan qosymsha Úkimet rezervinen halyqtyń qystaýy men Mańǵystaý oblysynyń agroqurylymdary úshin jem satyp alýǵa 1,9 mıllıard teńge bólinedi.
Qyzylorda oblysynyń Aral aýdanyndaǵy jaǵdaı da turaqtandy. Jalpy, azyqpen qamtamasyz etý máselelerin sheshýdi úılestirý úshin aýyl sharýashylyǵy mınıstrligi janynan Respýblıkalyq jedel shtab quryldy. Onyń quramyna oblystar men aýdandar ákimderiniń orynbasarlary, «Báıterek» holdıngi men Azyq-túlik korporasııasynyń qarjylandyrýshy uıymdarynyń basshylary engizildi.