Elimizde Ulttyq biryńǵaı testileý bıyl alǵash ret elektrondy formatta ótti. UBT-ny osy joly 145 myńnan asa talapker tapsyrdy. Olardyń 60 paıyzy, ıaǵnı 88 myńnan kóbi shekti ball jınady. Testileý tóńiregindegi osy jáne ózge de mańyzdy jańalyqtar Ortalyq kommýnıkasııalar qyzmetinde ótken brıfıngte aıtyldy.
Bilim jáne ǵylym mınıstrliginiń deregine súıensek, test tapsyrýshylardyń 57 187-si nemese 39,4%-y shekti ball ala almaǵan. Eń joǵary 140 baldy Pavlodar qalasynyń talapkeri jınady. 1923 oqýǵa túsýshi 120 baldan joǵary nátıjege qol jetkizdi. UBT-ny 109 693 nemese 75,5% túlek qazaq tilinde, 35 245 nemese 24,3% orys tilinde tapsyrdy. UBT-nyń ortasha baly 69,08 baldy qurady, bul ótken jyldyń kórsetkishinen 5 balǵa joǵary.
Atalǵan vedomstvo janyndaǵy Joǵary jáne joǵary oqý ornynan keıingi bilim departamentiniń dırektory Ádilet Toıbaev:
– Elimizde UBT tuńǵysh ret «1 kompıýter – 1 kamera – 1 test tapsyrýshy» qaǵıdaty boıynsha 51 pýnktte elektrondy formatta ótti. Bıylǵy test tapsyrýshynyń mańyzdy artyqshylyǵy – ony tapsyrýǵa eki múmkindik berilip, test tapsyrýshynyń eń jaqsy nátıjeni grant ıelený úshin konkýrsqa joldaı alatynynda. Sonymen qatar testileýdi tapsyrýdyń ashyqtyǵyn qamtamasyz etedi. Biz nusqalar men durys jaýaptar kodtarynyń biregeıligin oılastyrdyq. Iаǵnı ár nusqa kezdeısoq tańdaý arqyly ótinish berýshi qosymshada ruqsat alǵan kezde jasalady. Bul test nusqalary qaıtalanýynyń aldyn alyp, durys jaýaptar kodtarynyń sáıkes kelý yqtımaldyǵyn da joıdy. Jáne túlekter UBT-ny burynǵydaı bir aptanyń kóleminde emes, eki aıdan asa ýaqyttyń ishinde tapsyra alady, – dedi.
Vedomstvo ókiliniń aıtýynsha, jalpy eki jyldyq aprobasııa barysynda (aldymen pedagogterdi, sodan soń magıstratýraǵa túsýshilerdi jáne sodan keıin ǵana mektep oqýshylaryn elektrondy testileýge aýystyrdy) elektrondy testileý jetildirilgen. Bul formattyń qaǵaz túrindegi testileýden mynadaı artyqshylyqtary bar: talapker testileý kúni men ornyn ózi tańdaıdy; testileý ýaqytyn (jaýap paraǵyn boıaýǵa ýaqyt qurtpaı) únemdeý; aldyńǵy test tapsyrmalarynda tańdalǵan jaýaptardy qaıta ózgertý múmkindigi; testileý nátıjelerin óńdeý kezinde kezdesetin qatelerdi boldyrmaý, ıaǵnı jaýap paraǵynda boıalǵan nemese jartylaı boıalǵan jaýaptardy skanerdiń durys oqymaýy, jaýap paraǵyn toltyrý barysynda basqa sektorlardyń boıalyp ketýi jáne t.b; testilenýshi qate toltyrylǵan derekterin ózgertýge, sondaı-aq tapsyrý tilin, pánderin aýystyrýǵa múmkindigi bar; testileý nátıjeleri aıaqtalǵannan keıin birden sol jerde, sonymen qatar Jeke kabınette kórsetiledi; testileý aıaqtalǵannan keıin 30 mınýt ishinde apellıasııaǵa berýge bolady; beınabaqylaý kameralary arqyly bári baqylaýda; kalkýlıator, merzimdi kesteler jáne tuzdardyń erigishtigi kompıýterde ornatylǵan. Budan bólek kompıýterden kóz almaıtyn jáne múmkindigi shekteýli talapkerlerge jaǵdaı jasaý da qarastyrylǵan.
– Kompıýterdegi testileý erekshe nazar aýdarýdy qajet etetinin túsinip jáne kórý qabiletine áser etýi múmkin 4 saǵattyq júktemeni eskerip, biz úsh úzilisti qarastyrdyq: birinshisi 2 mınýt – testileý bastalǵannan 1 saǵat ótken soń (kózge arnalǵan jattyǵýlar men deneshynyqtyrý jattyǵýlaryn oryndaý úshin), ekinshisi 2 saǵattan keıin – 15 mınýt jáne úshinshisi 3 saǵattan keıin – 2 mınýt. Bilim berýde erekshe qajettilikteri bar balalarǵa da jaǵdaı jasaldy. UBT-ǵa múmkindigi shekteýli 90 bala qatysty. Olarǵa aýdıtorııalar men jeke kómekshiler uıymdastyryldy, – dedi Á.Toıbaev.
Mınıstrliktiń málimdeýinshe, sońǵy nátıjeler tamyz aıynda daıyn bolady. Qoldanystaǵy erejelerge sáıkes barlyq beınejazbalar osy jyldyń 25 tamyzyna deıin taldanyp, tyıym salynǵan zattardy paıdalaný anyqtalǵan jaǵdaıda, tapsyrýshy balymen qosa bilim berý grantyn taǵaıyndaý konkýrsynyń nátıjesi de joıylady. Byltyr beınejazbalar boıynsha taldaý júrgizilip, 152 talapkerdiń, onyń ishinde 100 grant ıegeriniń nátıjesi joıylǵan edi. UBT talaptaryna qatysty Ulttyq testileý ortalyǵy dırektorynyń mindetin atqarýshy Naýjan Dıdarbekova:
– Bıylǵy testileý kezinde erejelerdi buzǵany úshin 1 305 adam aýdıtorııadan shyǵarylyp, nátıjeleri joıyldy. Sonymen birge biz barlyq beınejazbaǵa taldaý jasaımyz. Bul úshin taǵy eki aı bar. Eger tyıym salynǵan zattardy paıdalaný faktileri anyqtalsa, talapker bilim berý grantynan aıyrylady. Byltyr bul normany alǵash ret engizdik, sonda 100-den asa túlek granttan aıyryldy. UBT-ǵa daıyndyq jáne tapsyrý barysynda biz talapkerlerdi birneshe ret akademııalyq adaldyqqa shaqyrdyq. Álemdik tájirıbede, ereje buzýshylarǵa qatysty odan da qatań sharalar qoldanylady. О́ıtkeni bolashaqta mundaı mamandar halyqty emdep, balalarymyzǵa bilim beredi, – dedi.