Qazaqstanda 800 myńǵa jýyq adamnyń kirisi kúnkóris deńgeıinen tómen. Bul týraly Memleket basshysy Qasym-Jomart Toqaev aıtty, dep habarlaıdy Egemen.kz.
«Taǵy bir másele - jumyspen qamtý jáne halyqtyń tabysyn arttyrý. Pandemııanyń saldarynan qarjylaı tabystyń azaıýy ózekti máselege aınaldy. Kedeıshilik deńgeıi 4,5 paıyz boldy. 800 myńǵa jýyq azamatymyzdyń kirisi kúnkóris deńgeıinen tómen. Turǵyndardyń naqty ári ataýly tabysynyń ósimi azaıyp ketti. Tabys túrlerindegi ózgerister de kóńil kónshitpeıdi», dedi QR Prezıdenti Úkimettiń keńeıtilgen otyrysy barysynda.
Memleket basshysynyń aıtýynsha, zeınetaqy, járdemaqy, shákirtaqy sııaqty áleýmettik transfertter artqanymen eńbek tabysy azaıyp bara jatyr.
«Shuǵyl ári aýqymdy sharalar qabyldaý qajet. Bul sharalar eńbek tabysy men kásipkerlik qyzmetpen aınalysýdan túsetin tabysty arttyryp, kóleńkeli ekonomıkanyń aýqymyn azaıtýǵa jáne basqa da bastamalardy qamtýǵa tıis», dedi Qasym-Jomart Toqaev.