Nur-Sultan turǵyndary 2021 jyldyń 12 qyrkúıegine deıin koreı sýretshisi Lı Inamnyń sıfrlyq óner týyndylarynyń kórmesin tamashalaı alady, dep habarlaıdy Egemen.kz.
Elordadaǵy QR Tuńǵysh Prezıdenti – Elbasy kitaphanasynyń mýzeıinde Koreıa Respýblıkasy elshiliginiń Koreı mádenı ortalyǵy Elbasy kitaphanasy jáne Nursultan Nazarbaev qorymen birlesip uıymdastyrǵan koreı sýretshisi Lı Inamnyń sıfrlyq óner týyndylarynyń kórmesi ashyldy.
Kórme aıasynda álemge áıgili koreı beıne sýretshisi Pek Namdjýnnyń murageri, áıgili koreı medıa óneriniń sheberi Lı Inamnyń jumystary usynyldy. Avtor Lı Inam Shyǵys Azııanyń klassıkalyq keskindemesiniń áıgili kartınalaryn negizge ala otyryp, shyǵys jáne batys ónerin úılestirip, sıfrlyq ónerdi usyndy.
«Men pandemııaǵa baılanysty ashylý rásimine qatysa almaǵanyma ókinemin. Biraq soǵan qaramastan, Qazaqstanda koreı klassıkalyq keskindemesiniń tanymal kartınalaryn paıdalana otyryp, sıfrlyq óner týyndylaryn kórsetetin kórmeniń mańyzy zor dep sanaımyn. Osy kórme úshin men «Jaryqtyń jandanýy» taqyrybyna jumystar daıyndadym. Onyń basty ıdeıasy kórme keńistigin jáne Koreıa men Qazaqstan arasyndaǵy ózara qarym-qatynastardyń tarıhı sıpatyn «jaryqtandyrý» boldy. Sol arqyly eki el arasyndaǵy berik dostyq pen yntymaqtastyqtyqtyń máni ashyldy», dedi kórme avtory Lı Inam onlaın baılanysqa shyǵyp.
Koreı mádenı ortalyǵynyń dırektory Lı Herannyń aıtýynsha, bul kórme Koreıa týraly negizinen K-pop jáne koreı serıaldary arqyly biletin qazaqstandyqtar úshin sıfrlyq óner arqyly koreı sulýlyǵyn sezinýge jáne bilýge múmkindik beredi. Sondaı-aq ol Qazaqstan men Koreıa arasyndaǵy dıplomatııalyq qatynastar ornaǵannan beri damyp kele jatqan eki el arasyndaǵy mádenı jáne ekonomıkalyq almasýdyń jandanýyna yqpal etedi.
«Bizdiń mádenı ortalyq Qazaqstan Respýblıkasy Táýelsizdiginiń 30 jyldyǵyn merekeleý aıasynda qazaqstandyqtarǵa koreı medıa óneriniń týyndylaryn usynýǵa qýanyshty. Avtor Lı Inamnyń eńbekteriniń arqasynda Koreıa týraly kóbirek bile alasyz, sondaı-aq ortalyqtyń aldaǵy is-sharalaryna úlken qyzyǵýshylyq tanytyp, qatysa alasyz dep úmittenemin», dedi Lı Heran.