Elimizde Áleýmettik qyzmetter portalyn qoldaý boıynsha baılanys ortalyǵy jumys isteı bastady. Buǵan tildi tańdap, 4 sanyn basa otyryp, biryńǵaı 1414 nómiri arqyly kirýge bolady. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Portal paıdalanýshylary – múgedektigi bar adamdar jáne áleýmettik qyzmetterdi kórsetýshiler úshin ortalyq operatorlary aqparattyq-konsýltasııalyq qyzmetterdi memlekettik jáne orys tilderinde usynady. Atap aıtqanda, bul portalda keńes alýǵa, tehnıkalyq máseleler boıynsha suraqtarǵa jaýap alýǵa, portal fýnksııalaryn jetildirý boıynsha keri baılanys ornatýǵa bolady. Búgingi tańda baılanys ortalyǵynda 3 analıtık jáne 5 operator jumys isteıdi, taǵy úsheýi arnaıy oqýdan ótip jatyr.
Sondaı-aq Facebook áleýmettik jelisinde, Telegram messendjerlerinde jáne WhatsApp paıdalanýshylaryna keńes berý úshin chat-botty iske qosý josparlanyp otyr. Buǵan qosa avtomattandyrylǵan daýystyq robotty engizý jumystary júrgizilýde. Bul konsýltasııalar qoljetimdiliginiń joǵary deńgeıin qamtamasyz etýge, jaýap berilmeı qalǵan qońyraýlar sanyn azaıtýǵa jáne másele sheshilgenge deıin kútý ýaqytyn azaıtýǵa múmkindik beredi.
Jalpy, Áleýmettik qyzmetter portaly múgedektigi bar adamdarǵa tikeleı jetkizýshilerden ońaltý quraldary men qyzmetterin óz betinshe satyp alý múmkindigin berý úshin 2020 jyly iske qosyldy. Osy jyldyń basynan bastap 113 myńnan asa múgedektigi bar adam portal arqyly ońaltýdyń tehnıkalyq quraldaryn, ymdaý tiliniń 6 myńnan asa qyzmetin, jeke kómekshiniń 31 myńnan asa qyzmetin, 36 myńǵa jýyq sanatorlyq-kýrorttyq emdeý qyzmetin aldy jáne 122 myńnan asa adam kepildik berilgen áleýmettik toptamalarǵa tapsyrys jasady.
«Egemen-aqparat»