Almaty oblysynyń Qapshaǵaı qalasynda Qazaqstan Respýblıkasy Táýelsizdiginiń 30 jyldyǵyna oraı jáne «Qaıyrymdy ister marafony» jalpyulttyq jobasy aıasynda «Asyl jurek» respýblıkalyq volonterler sleti ótti. Bul týraly Aqparat jáne qoǵamdyq damý mınıstrliginiń baspasóz qyzmeti habarlady.
Is-sharaǵa QR Aqparat jáne qoǵamdyq damý vıse-mınıstri Bolat Tlepov, Almaty oblysy ákiminiń orynbasary Arslan Dándibaev, jastar resýrstyq ortalyqtarynyń ókilderi jáne volonterler qatysty. Is-shara barysynda sanıtarlyq-epıdemıologııalyq talaptar tolyqtaı saqtaldy.
Respýblıkalyq slettiń basty mindetteri respýblıkanyń úzdik volonterlik top jetekshileriniń tájirıbe almasýy, olardy ózara yntymaqtastyqqa shaqyrý, volonterlik baǵyttar boıynsha biliktilikti arttyrý bolyp tabylady.
«Memlekettiń kózdegeni - halyqtyń volonterlikke degen qyzyǵýshylyǵyn arttyryp, olardyń kúndelikti qaıyrymdy isterge qatysýyn dástúrge aınaldyrý. Bul baǵytta birqatar naqty qadamdar júzege asýda. Birinshi, zańnamalyq deńgeıde ózgerister engizý aıasynda, volonterlerge oqýǵa túsý jáne jumysqa ornalasý kezinde jeńildikter berý, basqa da quqyqtar men mindetterdi keńeıtý kózdelýde. Ekinshi, ótken jyly qurylǵan volonterlerdiń respýblıkalyq jáne 17 óńirlik front-ofısteriniń jumysy jańa qarqyn aldy. Úshinshi, birqatar qaıyrymdylyq jáne áleýmettik mańyzy bar is-sharalar Memleket basshysynyń bastamasy boıynsha qolǵa alynǵan «Qaıyrymdy ister marafony» sheńberinde iske asyp jatyr. Tórtinshi, byltyr BUU Bas Assambleıasynyń 75-shi sessııasynda Prezıdentimiz Qasym-Jomart Kemeluly Toqaev volonterlerdi jumyldyrýdyń Halyqaralyq jylyn jarııalaý týraly bastamasyn usyndy. Osy ıdeıany sońyna deıin jetkizý maqsatynda halyqaralyq seriktestermen birlesken jumystar júrgizilýde», dep atap ótti B.Tlepov.
Is-shara barysynda atalmysh saladaǵy sarapshylar túrli trenıngter uıymdastyryp, alǵashqy volonterlik oıyndar ótti. Sondaı-aq, konserttik baǵdarlamamen otandyq estrada juldyzdary óner kórsetti.
Esterińizge sala keteıik, 2020 jyly pandemııamen kúreste 500 000 volonter kúsh biriktirip, elimizdiń 1 mıllıonǵa jýyq azamatyna kómektesti. Búginde Almaty oblysynda volonterler sany eki esege artyp, 7 myńǵa jetip otyr.