Atyraýda «Dına» bazaryndaǵy bekette vaksına alýǵa kelgen shetel azamaty dárigerlerge dórekilik tanytqan, dep habarlaıdy Egemen.kz.
Oblystyq densaýlyq saqtaý basqarmasy baspasóz qyzmetinen málim etkendeı, О́zbekstan Respýblıkasynyń 1998 jyly týǵan azamaty bıylǵy 16 maýsymda «Spýtnık V» vaksınasynyń I komponentin ektirgen. Sodan keıin jigitte janama áserler men asqynýlar tirkelmegen.
«Bul azamat 14 shildede jergilikti ýaqytpen saǵat 15:00-de vaksınanyń II komponentin saldyrǵan. Alaıda, vaksınany alǵanǵa deıin kezekte turǵan sheteldik azamat medısına qyzmetkerlerine dórekilik tanytqan. Vaksınanyń janama áseri týraly arandatý maqsatynda beınejazba túsiremin dep qorqytqan. Demalys bólmesinde 30 mınýttaı ýaqyt bolyp, úıge jiberildi» dep habarlady oblystyq densaýlyq saqtaý basqarmasynyń baspasóz qyzmeti.
Belgili bolǵandaı, 14 shildede jergilikti ýaqytpen 18:30-da «Dına» bazarynan jedel járdem qyzmetine qońyraý túsken. Onda dıspetcherge vaksına alǵan adamda qurysý belgisi baıqalǵany týraly habarlanǵan.
«Jedel járdem úsh saǵat buryn vaksına alǵan jáne dárigerlerge dórekilik tanytqan О́zbekstan azamatyna shaqyrylǵany belgili boldy. Sheteldik jigit oblystyq aýrýhananyń qabyldaý bólimine jetkizilip, 30 mınýttan keıin úıine jiberildi. Sebebi, onyń jaǵdaıy turaqty, aýrýhanaǵa jatqyzýǵa naqty dáıek bolǵan joq. Osyǵan baılanysty turǵyndardan arandatýshylyqqa den qoımaı, tek resmı aqparatqa senýdi suraımyz», dep málimdedi basqarmanyń baspasóz qyzmetinen.