Byltyr Atyraýdaǵy №1 qalalyq emhananyń esepshotynan 70 mln teńge urlanǵan edi. Jaqynda atalǵan qylmystyq iske qatysty kúdiktilerge sot úkimi shyqty, dep habarlaıdy Egemen.kz.
«2019 jyly 25 jeltoqsanda D.T. kásipkerlik qyzmetpen aınalysý maqsatynda Almaty oblysynyń Taldyqorǵan qalasynda «Lab service plus 1» jaýapkershiligi shekteýli seriktestigin tirkegen. Sodan keıin A.A. esimdi azamatpen jáne sotqa deıingi tergep-tekserý kezinde anyqtalmaǵan belgisiz tulǵalarmen aldyn ala sóz baılasý arqyly 2020 jylǵy 13 shildede Almaty qalasynda bankten shot ashyp, bankomattyq kartochka men onlaın bankıng kiltin alǵan. Soljyldyń 3 tamyzynda belgisiz tulǵalar saǵat 16:00-den 17:00-ge deıingi aralyqta №1 Atyraý qalalyq emhanasynyń qarjy-sharýashylyq qyzmetiniń aqparatyna zańsyz qol jetkizip, býhgalterııanyń qashyqtyqtan aqparattyq qol jetkizý júıesine ruqsatsyz kirgen. Onda emhana úshin joqtólemder jasap, №1 Atyraý qalalyq emhanasynyń esepshotynan «Lab service plus 1» JShS-tiń esepshotyna jáne sottalýshy D.T.-nyń jeke shotyna COVID-19 qarsy kúreske bólingen qarajat esebinen 70 000 000 teńge aqshany aýdarǵan. Keıin sońǵysy aqshany qolma-qol sheship alyp, №1 Atyraý qalalyq emhanasyna joǵaryda kórsetilgen somada múliktik zııan keltirgen» dep habarlady oblystyq sottyń baspasóz qyzmeti.
Atyraý qalasynyń №2 sotynyń úkimimen D.T. men A.A. QR Qylmystyq Kodeksiniń 188-babynyń 4-bóligi, 3) tarmaǵymen (Urlyq, ıaǵnı aldyn ala adamdar tobymen sóz baılasý arqyly, asa iri mólsherde, aqparattyq júıege zańsyz kirý jolymen, bótenniń múlkin jasyryn jymqyrý) kináli dep tanyldy.
Sot qylmystyq quqyq buzýshylyqtyń sıpaty men qoǵamǵa qaýiptilik dárejesin eskere otyryp, Qylmystyq Kodeksiniń 55-babynyń 2-bóligimen D.T-ǵa 6 jyl 6 aı, A.A-ǵa 5 jyl merzimge bas bostandyǵynan aıyrý jazasyn taǵaıyndady.
Sot úkimi zańdy kúshine engen joq.