Almaty polısııasy jalǵan vaksınasııa tólqujatyn qandaı medısınalyq mekemeler jasaǵanyn aıtty. Bul týraly Polisia.kz habarlady, dep jazady Egemen.kz.
Bul týraly tártip saqshylary “ZOOM” beıneplatformasy arqyly ótken medısınalyq mekemelerdiń arnaıy jınalysy kezinde habarlady.
«Turaqty negizde ınternet-resýrstarǵa jáne buqaralyq aqparat quraldaryna monıtorıng júrgizilip, medısınalyq anyqtamalardy qoldan jasaý faktilerin anyqtaý boıynsha jedel sharalar qabyldanyp otyr. Eske salaıyq, jaqynda azamattardy Saýd Aravııa Koroldigine jiberý úshin 140-tan astam jalǵan vaksınasııa tólqujatyn jasaýmen aınalysqan týrıstik kompanııa anyqtaldy. Sonymen qatar, tergeý satysynda №21, №4, №16 jáne №13 qalalyq emhanalardyń jalpy tájirıbelik dárigerlerine qatysty qylmystyq ister qaralyp jatyr. Olar kirgen azamattarǵa vaksınasııany salmaı-aq, dozanyń birinshi komponentin qabyldaý týraly jalǵan derekterdi bazaǵa engizgen nemese vaksınasııa bólmesinde beınebaqylaý kamerasy bolsa, olar ekpeni alǵandaı etip kórsetip ekpe salynǵan oryndy plastyrmen jabystyrǵan. Bul qyzmetterdiń barlyǵy aqshalaı syıaqy úshin usynylǵandyǵy anyq», dedi óz sózinde Almaty qalalyq Polısııa departamenti bastyǵynyń birinshi orynbasary Nurlan Almasbekov.
Sonymen qatar, spıker jalǵan qujat jasaǵany úshin qylmystyq jaýapkershilik 4 jylǵa deıin bas bostandyǵynan aıyrý túrinde ekendigin, al ony qoldanǵany úshin 40 táýlikke qamaýǵa alý túrinde qarastyrylǵanyn eske túsirdi. Sondaı-aq, joǵaryda atalǵan azamattardyń áreketterinde «qyzmettik jalǵandyq» belgileri bar, ıaǵnı, jalǵan aqparatty resmı qujattarǵa engizý.