Jýyrda ǵana petropavldyq áıel polısııaǵa júginip, kúıeýiniń joǵalyp ketkenin aıtqan. 17 shilde kúni 45 jastaǵy er adam kólikpen ketip, qaıtyp oralmaǵan. Ony izdeýge polısııanyń jeke quramy men bólingen basqa kúshter jumyldyryldy. Baılanysqan adamdary men bolýy múmkin oryndar tekserildi. Izdeýge eriktiler de tartyldy. Biraq áli kúnge joǵalǵan adamnan habar joq. Aıdyń-kúnniń amanynda bildeı bir azamat iz-tússiz ǵaıyp bolyp otyr.
Sondaı-aq, qazir Petropavl qalasynyń taǵy da tórt turǵyny izdestirilýde. Olardyń arasynda este saqtaý qabileti nashar 73 jastaǵy keıýana bar. 3 maýsym kúni polısııaǵa onyń uly júginip, birneshe kún buryn anasynyń úıden shyǵyp ketip, qaıtyp kelmegenin habarlaıdy.
Izdestirýdegi adamdardyń júrgen jerleri týraly aqparattaryńyz bolsa, polıseıler Petropavl qalasyndaǵy 39-41-16 nemese «102» arnasyna habarlasýlaryńyzdy suraıdy.
«Jaqyn adamdarynyń joǵalyp ketýi týystary úshin úlken qaıǵy. Kóp jaǵdaıda joǵalǵandardyń ómir súrý jaǵdaıy olardy qaı jerlerden izdeý qajet ekenin anyq kórsetedi. Al este saqtaý qabiletinen aıyrylǵan adamdy izdeý qıynǵa soǵady. Onyń turatyn mekenjaıy, saparjaı, qalanyń birqatar aýdandary, medısınalyq mekemeler, beıimdeý ortalyǵy, qabyldap-taratý orny tekserildi. Izdeý jumystary áli de jalǵasýda. Oǵan eriktiler de tartylǵan. Olar joǵalǵandar týraly baǵdarlardy, qala kóshelerinde taratyp, áleýmettik jelilerde jarııalaıdy. Jeli qoldanýshylary habarlaıtyn aqparattardy jetkizedi», deıdi SQO PD Krımınaldyq polısııa basqarmasy bastyǵynyń mindetin atqarýshy polısııa podpolkovnıgi Marat Jumalıev.
Oblysta jyl basynan beri joǵalǵandar týraly 223 aryz túsip, olardyń 219-y izdep tabylǵan.