Shymkent qalasynyń ákimi Murat Áıtenovtiń jetekshiligimen ınvestısııalyq shtabtyń kezekti otyrysy ótti. Onlaın formatta ótken jıynǵa salalyq basqarma basshylary men aýdan ákimderi, iskerlik orta ókilderi qatysty, dep jazady Egemen.kz qala ákiminiń baspasóz qyzmetine silteme jasap.
Jıyn barysynda agroındýstrııalyq aımaqty qurý jónindegi jumystyń barysy, ınvestısııalyq jobalardyń tanystyrylymy men olardy iske asyrý barysyndaǵy uıymdastyrýshylyq máseleler, shtab otyrystarynda berilgen hattamalyq tapsyrmalardyń oryndalýy talqylandy.
Qala ákimi M.Áıtenov agroındýstrııalyq aımaq ornalasatyn aýmaqtyń ınfraqurylymdyq áleýetin tolyq zerdeleýdi tapsyrdy. Beriletin elektr energııasy qýatyn, sý kózi qoryn esepteý boıynsha naqty jumystar atqarylýy kerektigine kóńil bóldi.
Shtab otyrysynda qalalyq aýylsharýashylyǵy jáne veterınarııa basqarmasy usynǵan ınvestısııalyq jobalar qaraldy. Onyń ishinde jylyna 50 mln dana jumyrtqa shyǵarýdy kózdep otyrǵan «Aımar qus» JShS-nyń qus fabrıkasyn ashýǵa qajetti ınfraqurylym tartý máselesi sóz boldy. Jobamen muqııat tanysqan qala ákimi M.Áıtenov salalyq basqarma basshylaryna tıisti usynystar engizý jóninde tapsyrma berdi.
Qus fabrıkasyn salýǵa «Shaǵyr Agro» kompanııasy da múddeli. Munda jylyna 20 myń tonna broılerlik qus eti óndirilmek. Jobany iske asyrý úshin aýmaq josparyna ózgeris engizý qajet. Qala ákimi M.Áıtenov bul másele boıynsha da salalyq basqarmaǵa máseleni tolyq zerdelep, tıisti sheshim qabyldaýdy júktedi.
Basqarma usynyp otyrǵan taǵy bir joba – 600 bas iri qaraǵa arnalǵan et-sút fermasy. Bul joba boıynsha qalanyń Bas josparyna sáıkes naqty sheshim qabyldanatyn bolady.
Jıyn barysynda birqatar ınvestısııalyq qurylys jobalarynyń da tanystyrylymy ótti. Onyń ishinde «Shymkent aqparattyq tehnologııalar ýnıversıteti» ǵylymı jáne bilim berý ınnovasııalyq keshenin salý jobasy usynyldy. Keshen aqparattyq tehnologııalar boıynsha ǵylymı baza retinde jasaqtalyp, laborotorııalyq zerthanalar ashylmaq. Munda 6 myń stýdent bilim alyp, jataqhanamen qamtylady. Keshende 600 adam eńbek etetin bolsa, onyń 400-den astamy – otandyq jáne sheteldik ǵalymdar bolady dep josparlanǵan.
Keshen jobasymen jiti tanysqan qala ákimi M.Áıtenov bul jobany qurylysy qarqyn alǵan Turan shaǵyn aýdanynda ornalastyrý múmkindikterin qarastyrýdy tapsyrdy.
Medısına qyzmetkerlerine arnalǵan 12 qabatty turǵyn úı qurylysyn júrgizý máselesi de shtab otyrysynda qaralyp, qoldaý tapty. Turǵyn úı kelesi jyly alǵashqy turǵyndaryn qabyldaıtyn bolady.
«Shymkent sıtı» shaǵynaýdanynda salynatyn 2 zamanaýı jekemenshik mektep jobasy da qoldaý taýyp, qurylys jumystary jaqyn kúnderi bastalatyn boldy. Oqý ordalarynyń jalpy syıymdylyǵy 2200 oqýshyǵa arnalǵan.
Shtab barysynda bıznes sanatyndaǵy 8 kópqabatty turǵyn úı jobasy tanystyrylyp, maquldandy. Qurylys jumystaryn otandyq jáne sheteldik qurylys kompanııalary júrgizetin bolady.
Jıynda, sondaı-aq, «Tasken» shaǵynaýdanynda salynatyn 300 oqýshyǵa arnalǵan jekemenshik mektep pen 500 orynǵa arnalǵan jataqhana jobasy tanystyryldy. Usynylǵan nysandar qoldaý taýyp, qurylysy da jaqyn kúnderi bastalady.
Qala basshysy M.Áıtenov Shymkenttiń órkendeýine ınvestorlar qyzyǵýshylyq tanytyp otyrǵanyn málimdedi. Bul, ásirese, qurylys salasynyń qarqyn alýyna negiz bolyp otyr. Ákim osy oraıda sala jetekshilerine jer ýchaskesin bólý kezinde qurylys júrgizý qarqynyn esepke alýdy tapsyrdy. Bólingen jer ýchaskeleri belgili merzim ishinde ıgerilmese, qaıtaryp alý jóninde mehanızmder qalyptastyrýdy júktedi.
Kún tártibindegi úshinshi másele boıynsha shtabtyń aldyńǵa otyrystarynda berilgen hattamalyq tapsyrmalardyń ishinde 5 másele merziminde oryndalmaǵany aıtyldy. Qala ákimi memlekettik qurylym jetekshilerine berilgen tapsyrmalardyń barlyǵy merziminde ári sapaly oryndalýy kerektigine nazar aýdaryp, ekonomıkaǵa ınvestısııa tartý máselesi jaıbaraqattylyqty kótermeıtinin málimdedi. Aldaǵy aptada ınvestısııa boıynsha jumys jıyny ótetinin habarlap, saladaǵy ózekti máselelerdi taǵy bir márte pysyqtaý kerektigin eskertti.
Shtab otyrysyn qorytyndylaǵan qala basshysy M.Áıtenov Shymkenttiń zamanaýı megapolıs retinde qalyptasýy ınvestısııa arqyly júzege asatynyn jetkizdi. Investorlar tartý arqyly qala ekonomıkasy serpin alady. Investısııa tartýǵa jaýapty qurylymdar qurylys naryǵymen shektelip qalmaı, óndiristik jobalardy izdestirýde belsendilik tanytýy kerek ekenin eske saldy. О́ndiris oryndaryn ashý arqyly turaqty jumys oryndary ashylyp, ekonomıka úlesinde jergilikti taýar úlesi artatynyn, qala turǵyndarynyń turmystyq ahýaly jaqsaratynyn málimdedi. Barlyq sala jetekshilerin osy baǵytta nátıjeli jumys júrgizýge shaqyrdy.