Búgin Aqtóbe oblysynyń Aqqudyq aýyly men 34 aýyldyq okrýginiń ákimderi saılanbaqshy. Qazir 74 saılaý ýchaskelerinde aýyl ákimderine daýys berý bastaldy, dep habarlaıdy Egemen.kz.
Oblystyq aýmaqtyq saılaý komıssııasynyń málimetine qaraǵanda, jergilikti ýaqytpen 11.30-de saılaý ýchaskelerinde tirkelgen 11 myń 433 saılaýshy daýys berip úlgerdi. Saılaýǵa qatysý belsendiligi jaǵynan Shalqar, Qarǵaly, Áıteke bı, Mártók, Hromtaý aýdandarynyń turǵyndary ozyp tur.
Aýdan ákimderin saılaý kezinde qoǵamdyq qaýipsizdikti saqtaýǵa oblys boıynsha 196 polısııa qyzmetkeri jumyldyrylǵan. Sondaı-aq 74 polısııa qyzmetkeri oblys ortalyǵynan 12 aýdanǵa bıýlletenderin saılaý ýchaskelerine jetkizýge qatysty.
Baıǵanın aýdanynyń Kóltaban, Sartoǵaı, Qyzylbulaq aýyldyq okrýgteri ákimderi, Áıteke bı aýdanynyń T.Júrgenov, Áıke, Jambyl, Úshqatty, Tumabulaq, Araltoǵaı, Qaıraqty aýyldyq okrýgteriniń ákimderi saılanbaqshy.
Muǵaljar aýdany boıynsha Qaıyńdy aýyldyq okrýginiń ákimi bolýǵa 3 úmitker tirkelgen. Olar «Aqjol» demokratııalyq partııasynyń atynan Djalı Tlepbaıuly Abdıev, «Nur Otan» partııasy atynan Nurbolat Jolamanuly Jalǵas jáne ózin-ózi usynǵan Rýslan Ádiluly Tórebekov. 1225 turǵyny bar Qaıyńdy aýyldyq okrýginiń Altyndy jáne Qaıyńdy eldi mekenderiniń 712 saılaýshysy óz tańdaýlaryn jasaıtyn bolady.
Qobda aýdanynyń I.Qurmanov, Sarbulaq, Taldysaı, Jarsaı, Terisaqqan aýyldyq okrýgterinde de jańa ákim saılanbaqshy. Osy aýdanda 8 saılaý ýchaskesi ashylǵan.