Reanımasııa bólimine KVI-ǵa qarsy vaksına almaǵan pasıentter túsip jatyr. Stasıonarǵa jetkizilgennen keıin olardyń densaýlyǵy eki-úsh kúnde óte aýyr kúıge deıin nasharlaıdy. Bul týraly qalalyq qoǵamdyq densaýlyq saqtaý basqarmasynyń basshysy Tımýr Muratov aıtty.
«Bizdegi reanımasııalyq tósekter 84%-ǵa toldy. Koronavırýs ınfeksııasyna qarsy ekpe almaǵan, aýyr kúıde jatqan 248 pasıent bar. Onyń ishinde 77 adam óte aýyr halde jatyr. Naýqastardyń basy-qasynda júrgendikten bul kórsetkish qatty alańdatyp otyr. Biz ótken jylǵy eń aýyr kúıge jeteıin dep qaldyq», - deıdi basqarma basshysy.
Tımýr Muratovtyń aıtýynsha aýyr kúıde jatqandar arasynda qart kisiler ǵana emes 35 jastaǵy naýqastar da bar.
«Vırýs jańa shtammdarǵa mýtasııalanyp otyrady, al árqaısysynda naýqastar jastar arasynda jıileıdi. Qazir jastar da, tipti balalar da aýrýdyń aýyr kúıine ushyraı bastady. Eki-úsh kún ishinde pasıentterdiń densaýlyǵy nasharlaǵany sonshalyq jasandy tynys alý apparatynsyz ómir súre almaıtyn kúıge jetedi. Reanımasııadaǵy barlyq pasıenttiń mundaı jaǵdaıǵa túsýiniń sebebi – vaksınasııalanbaǵan. Biraq olar muny kesh túsindi», dep atap ótti T. Muratov.
Tımýr Muratov qala turǵyndaryn ýaqytynda vaksınasııadan ótýge, osy arqyly ózderin ınfeksııa juqtyrýdan qorǵaýǵa shaqyrdy.
«Qurmetti azamattar! Oılanyp jáne kútip otyratyn ýaqyt joq! Qazir vaksınasııa alý óte mańyzdy, áıtpese kesh bolýy múmkin. Bizge, ıaǵnı dárigerlerge, KVI-ge baılanysty qaıtys bolǵandar statıstıkasyn jarııalaý, týystaryna jaqyny kelmeske ketkenin aıtý ońaı emes. О́tken jyly biz pandemııany jeńýdiń barlyq jolyn izdegen edik, al qazir qolymyzda bar, ol – vaksınasııa. Osy arqyly ǵana biz aýrýdyń qıyn kezeńinen shyǵa alamyz», dep qorytyndylady qalalyq densaýlyq saqtaý basqarmasynyń basshysy.