Indet qaıta kúsh alyp barady. Byltyrǵyǵa qaraǵanda koronavırýstyń taralýy edáýir artqan. «Qyzyl aımaqta» turǵan elimizdiń bul aýrýdan aman turǵan aımaǵy joqtyń qasy. Ásirese, astanamyz Nur-Sultan qalasyndaǵy asqynǵan ahýal ońalar emes. Elordada aýrýhanaǵa kúnine 200-den asa adam túsip jatyr. Al indet juqtyrǵany anyqtalyp, úıinde oqshaýlanǵan turǵyndar qanshama?
Búgingi tańda elordada ınfeksııalyq stasıonarlarda 2 940 naýqas em qabyldap jatyr. Infeksııalyq tósektik oryn júktemesi 83%-dy quraıdy. Jansaqtaý bóliminde 240-tan asa adam jatyr, onyń 49-y О́JJ apparatynda jatyr. Al jansaqtaý bólimindegi tósektik oryn júktemesi – 84%. Kúnine 200-den asa adam aýrýhanaǵa túsip jatyr.
Qalalyq qoǵamdyq densaýlyq saqtaý basqarmasynyń basshysy Tımýr Muratovtyń aıtýynsha, jansaqtaý bólimine KVI-ǵa qarsy vaksına almaǵan pasıentter túsip jatyr. Stasıonarǵa jetkizilgennen keıin olardyń densaýlyǵy eki-úsh kúnde óte aýyr kúıge deıin nasharlaıdy.
«Bizdegi jansaqtaý bólimindegi tósektik oryndar tolýǵa shaq tur. Koronavırýs ınfeksııasyna qarsy ekpe almaǵan, aýyr kúıde jatqan 248 pasıent bar. Onyń ishinde 77 adam óte aýyr halde jatyr. Naýqastardyń basy-qasynda júrgendikten, bul kórsetkish qatty alańdatyp otyr. Biz ótken jylǵy eń aýyr kúıge jeteıin dep qaldyq», deıdi basqarma basshysy.
Ol aýyr kúıde jatqandar arasynda qart kisiler ǵana emes 35 jastaǵy naýqastar da bar ekenin atap ótti.
«Vırýs jańa shtamdarǵa mýtasııalanyp otyrady, árqaısysy jastar arasynda jıi juǵa bastaıdy. Qazir jastar da, tipti balalar da aýrýdyń aýyr kúıine ushyraı bastady. Eki-úsh kún ishinde pasıentterdiń densaýlyǵy nasharlaǵany sonshalyq, jasandy tynys alý apparatynsyz ómir súre almaıtyn kúıge jetedi. Jansaqtaý bóliminde barlyq pasıenttiń mundaı jaǵdaıǵa túsýiniń sebebi – vaksınalanbaǵan. Biraq olar muny kesh túsindi», dedi T.Muratov.
Osydan eki kún buryn COVID-19-ben kúrestiń aldyńǵy shebinde júrgen elordalyq dárigerler BAQ arqyly aýrýhanadaǵy jaǵdaıdy kórsetken edi. Kadrlardyń birinde áreń dem alyp jatqan er adamnyń keýdesi kórsetilgen. Pasıenttiń ózdiginen dem ala almaı, arnaıy apparatqa qosylǵanyn kórýge bolady.
Naýqastardyń biri – zeınetker Mádına Syzdyqova aýrýhanada jubaıymen birge jatqanyn, qazir ekýiniń de jaǵdaıy edáýir jaqsaryp qalǵanyn aıtty. «Jubaıym ekeýmiz qaýipsizdik sharalaryn saqtap júrgende bári jaqsy bolatyn. Kópshilikke koronavırýspen aýyrǵan adam retinde bul aýrýǵa júrdim-bardym qaraýǵa bolmaıtynyn eskertkim keledi. Bul vırýs óte qaýipti. Qorqatyndaı-aq qaýipti», deıdi ol.
Bul rette ınfeksııalyq stasıonarǵa qaıta beıimdelgen Kópbeıindi qalalyq balalar aýrýhanasynyń ınfeksıonıst dárigeri Aınur Omarova qala turǵyndaryna úndeý joldady. «Jaǵdaıdyń aýyr ekenin aldyńǵy shepte kúresip júrgen bizden estigenderińizdi qalaımyn. Aýyr naýqastar kóp, reanımasııalyq tósektiń bireýi de bos emes. Indet juqtyrǵan balalar kóp. О́z densaýlyǵyńdy, ózgelerdiń densaýlyǵyn qorǵaýdyń joly – sanıtarlyq normalardy saqtaý jáne vaksına saldyrý. Vaksına ǵana aýrýdyń aýyr kúıinen jáne О́JJ apparatyna kiriptar bolýdan qorǵaıdy», deıdi dáriger.