112 myń teńge: El azamattarynyń ortasha aılyq shyǵyny esepteldi

Ulttyq statıstıka bıýrosynyń deregine súıensek, ótken jyldyń qazan-jeltoqsan aılarynda jan basyna shaqqandaǵy ortasha ataýly tabys 374,3 myń teńgeni quraǵan. Bul 2024 jyldyń sáıkes kezeńimen salystyrǵanda 9% joǵary. Tabys qurylymynda eń úlken úles eńbek qyzmetine tıesili – 280,2 myń teńge (+8,7%).

Alaıda shyǵyn kólemi budan da jyldam ósken. Orta eseppen bir otandasymyz toqsanyna 338,4 myń teńge jumsaǵan, bul ótken jylmen salystyrǵanda 9,4% kóp. Osylaısha aı saıynǵy shyǵys shamamen 112,8 myń teńgege jetken.

Dástúrli túrde tabys deńgeıi boıynsha iri qalalar alda. Eń joǵary kórsetkishter Astanada – 528,4 myń teńge (+5%), Qaraǵandyda – 521,8 myń teńge (+13,9%) jáne Almatyda – 483,5 myń teńge (+3,4%).

Al eń tómen tabys Túrkistan (235 myń teńge) jáne Jambyl (275,4 myń teńge) oblystarynda tirkelgen. Degenmen bul óńirlerde ósim qarqyny respýblıkalyq deńgeıden joǵary – tıisinshe 13,6% jáne 14,6%.

El turǵyndary tabysynyń kóp bóligin azyq-túlikke jumsaıdy

Shyǵyn qurylymy: Azyq-túlik pen nesıe

Otbasy bıýdjetiniń jartysynan astamy, naqtyraq aıtqanda, azyq-túlikke 177,2 myń teńge jumsalǵan. Bul shyǵyn bir jylda 14,3%-ǵa ósken. Baǵanyń aıtarlyqtaı qymbattaýy myna taýarlarǵa tıesili:

Et – 58,9 myń teńge (+23,6%); Kókónis pen jemis-jıdek – 25,2 myń teńge (+12%); Nan jáne jarma ónimderi – 23,6 myń teńge (+9,7%).

Azyq-túlikke jatpaıtyn taýarlarǵa jumsalǵan qarajat 72 myń teńgeni quraǵan. Bul kórsetkish aıtarlyqtaı ózgermegenimen, avtokólik pen janarmaı satyp alý 8,7%-ǵa azaıyp, kerisinshe kıim-keshekke suranys 5,4%-ǵa artqan.

Aqyly qyzmetterge ketetin shyǵyn 8,3%-ǵa ósip, 61,8 myń teńgege jetken. Negizgi ósim kommýnaldyq qyzmetter men baılanys tarıfteriniń qymbattaýymen baılanysty (+14,6%).

Tutynýshylyq nesıe naryǵyndaǵy qaýip: Bereshek kólemi nege ósýi múmkin?

Nesıe júktemesi óńirlerde árkelki

Sarapshylar nesıe men qaryzdy óteýge erekshe nazar aýdardy. Orta eseppen qazaqstandyqtar toqsanyna 20,6 myń teńgeni osy maqsatqa jumsaǵan, ótken jylmen salystyrǵan 8,4%-ǵa kóp.

О́ńirler arasyndaǵy aıyrmashylyq aıqyn:

Ulytaý oblysynda kórsetkish eń joǵary – 65,6 myń teńge (+17,3%); Qaraǵandy oblysynda – 43,4 myń teńge; Aqmola oblysynda – 39,1 myń teńge.

Astanada bul shyǵyn 38 myń teńge bolsa, Almatyda nebári 11 myń teńgeni quraǵan (–21,7%). Eń tómen kórsetkish Shymkentte tirkelgen – 3,2 myń teńge, munda shyǵyn kólemi 1,6 esege azaıǵan.

Al Mańǵystaý oblysynda kerisinshe, rekordtyq ósim baıqaldy: bir jyl ishinde nesıe óteýge jumsalatyn qarajat 20 ese artyp, 394 teńgeden shamamen 8 myń teńgege deıin jetken.

Sarapshylardyń pikirinshe, tabys pen shyǵys arasyndaǵy bul alshaqtyq halyqtyń jınaq aqsha jınaý múmkindigin shektep, tutynýshylyq nesıege táýeldilikti arttyrýy múmkin.