Senat Tóraǵasy Máýlen Áshimbaevtyń «Turkistan» gazetinde jarııa kórgen «Reformalar máni-6: Qubylmaly álemdegi strategııalyq múmkindikter» atty jańa maqalasynda Qazaqstannyń syrtqy saıası baǵytynyń transformasııasyna erekshe nazar aýdarylǵan. Elimizdiń boıtumaryna aınalǵan kópvektorly syrtqy saıasat qazirgi jaǵdaıda sapalyq turǵydan jańa mazmunǵa ıe bolǵany atap ótiledi, dep jazady Egemen.kz.
Máýlen Áshimbaevtyń paıymdaýynsha, bul rette Memleket basshysynyń orasan zor dıplomatııalyq tájirıbesine negizdelgen sheshimderi sheshýshi ról atqardy.
«Qazir Prezıdentimiz Qasym-Jomart Kemeluly Toqaev sol tujyrymdamany jańa jahandyq syn-qaterlerge beıimdedi. Kúsh ortalyqtary arasyndaǵy tepe-teńdikten Qazaqstan belsendi túrde kóptegen parallel halyqaralyq jelilerge qosyla bastady. Biz bir ýaqytta EAEO men ShYU, C5+1 jáne Eýropalyq Odaqpen keńeıtilgen seriktestik kelisimine qol jetkizip, Túrki memleketteri uıymy men Islam Yntymaqtastyǵy Uıymyna qatysý arqyly atalǵan alańdar toǵysatyn torapqa aınalyp otyrmyz», dep jazady Máýlen Áshimbaev.
Máýlen Áshimbaev: Referendým – «Halyq únine qulaq asatyn memleket» tujyrymdamasynyń jarqyn kórinisi
Maqalada atap kórsetilgendeı, jańa model qazirdiń ózinde naqty nátıjeler berýde. Burynǵy kezeńnen aıyrmashylyǵy, ol «ımıdjdik emes, naqty kiristermen ólshenetin nátıjeler ákelýdi» qamtamasyz etedi.
«Kópvektorlyq 2.0» «romantıkalyq dıplomatııadan» naqty múddeler dıplomatııasyna, ekonomıkalyq pragmatızm saıasatyna kóshýdi jáne qubylmaly dáýirdiń syn-qaterlerin eńserýdi kózdeıdi», dep atap ótti Máýlen Áshimbaev.
Maqalada Qazaqstannyń belsendi kópvektorly saıasatynyń negizgi basymdyǵyna aınalǵan qaýipsizdik máselelerine de erekshe kóńil bólingen. Elimiz qaqtyǵystardy saıası-dıplomatııalyq jolmen retteýdi jáne halyqaralyq quqyqty nyǵaıtýdy dáıekti túrde jaqtap keledi.
Máýlen Áshimbaev: Jańa Konstıtýsııadaǵy ekologııalyq erejelerdiń Shyǵys Qazaqstan úshin mańyzy zor
Senat Spıkeri osy turǵyda Qazaqstan Prezıdenti Qasym-Jomart Toqaevtyń jahandyq ınstıtýttardy reformalaý, sonyń ishinde Jahandyq Ońtústik elderiniń múddelerin eskerýge jáne orta derjavalardyń rólin kúsheıtýge baǵyttalǵan BUU-nyń aýqymdy reformasy boıynsha bastamalaryn belsendi ilgeriletip jatqanyn aıtady.
Osylaısha, maqalada atap kórsetilgendeı, kópvektorlylyq 2.0 jaı ǵana syrtqy saıası ustanym emes, qalyptasyp jatqan mýltıpleksti álem jaǵdaıynda Qazaqstannyń turaqtylyǵyn, qaýipsizdigin jáne ekonomıkalyq damýyn qamtamasyz etý strategııasyna aınalýda.