Aqtóbe oblysyndaǵy Temir qalasynyń turǵyndary bastama kóterip, eldi mekenge qala emes, aýyl mártebesin berýdi surap otyr, dep habarlaıdy Egemen.kz.
Turǵyndardyń aıtýynsha, qazirgi qala mártebesi memlekettik baǵdarlamalarǵa qatysýǵa jáne jas mamandardy tartýǵa kedergi keltirip otyr.
1870 jyly Qaraqamys ataýymen negizi qalanǵan Temir kezinde iri saýda ortalyǵy bolǵan. Munda Tashkent, Buhara, Ýfa, Orynbor jáne Orsk qalalarynan kópester kelgen. Qalanyń baı tarıhynan XIX ǵasyrdyń sońy men XX ǵasyrdyń basyndaǵy tarıhı ǵımarattar áli kúnge deıin saqtalǵan.
Solardyń qatarynda eski meshit, shirkeý jáne 1895 jyly salynǵan úı bar. Jergilikti turǵyndardyń aıtýynsha, 1918 jyly bul úıde qoǵam jáne saıası qaıratker Mustafa Shoqaı qysqa ýaqyt turǵan.
Qazirgi tańda Temirde mektep, eki balabaqsha jáne dárigerlik ambýlatorııa jumys isteıdi. Degenmen, turǵyndar jas mamandardy tartý qıyndap bara jatqanyn aıtady.
«Jastar konkýrstarǵa onsha belsendi qatyspaıdy. Bizde qala mártebesi bolǵandyqtan óte az adam júginedi. Sebebi aýyl men qala arasynda jalaqyda aıyrmashylyq bar», dep túsindirdi mektep dırektory Sandýǵash Tasbaýova.
Sondaı-aq ol qala mártebesine baılanysty Temir turǵyndarynyń aýyldarǵa arnalǵan keıbir memlekettik baǵdarlamalarǵa qatysa almaı otyrǵanyn atap ótti.
Almatyda 5%-dyq ıpoteka beriledi: Jastarǵa arnalǵan baǵdarlamanyń sharttary qandaı?
Eske sala keteıik, buǵan deıin sońǵy bes jylda 4 myńnan astam bilikti maman elden ketkenin jazǵan edik.