Almaty oblysy aýmaǵynda óz áıelin kólikpen aıaýsyz qaǵyp óltirgen er adam qamaýǵa alyndy. Qaıǵyly oqıǵa Qonaev – Baqanas tasjolynda bolǵan, dep habarlaıdy Egemen.kz.
Marqum Darına Qabdýldanovanyń týystarynyń aıtýynsha, jolda erli-zaıyptylar arasynda janjal shyqqan. Osydan keıin kúıeýi áıelin jol jıeginde qaldyryp ketip, keıin artynan qaıtadan baryp qaǵyp ketken. Áıel alǵan jaraqattarynan oqıǵa ornynda kóz jumǵan.
Týystarynyń sózinshe, 37 jastaǵy kúdikti aýdandyq polısııa bólimderiniń birinde basshylyq qyzmet atqarady jáne oqıǵa kezinde qyzmettik kólik basqarǵan. Erli-zaıyptylar buǵan deıin polısııa salasynda birge jumys istegen.
О́z áıelin qaǵyp óltirgen: Kúdikti polısııa qyzmetkeri bolýy múmkin
Almaty oblysy Polısııa departamentiniń resmı ókili Ernar Saıdıldın kúdiktiniń ustalyp, ýaqytsha ustaý ızolıatoryna qamalǵanyn málimdedi. Onyń aıtýynsha, atalǵan fakti boıynsha qylmystyq is qozǵalyp, tergeý amaldary júrgizilip jatyr.
Ishki ister mınıstrligi bul aqparatqa qatysty ázirge túsinikteme bergen joq.
Aıta keteıik, buǵan deıin Almaty oblysyndaǵy kólik tizgindegen jasóspirim 12 jastaǵy balany qaǵyp ketken edi.
Aqtaýdaǵy 27-shaǵynaýdanda polısııa qyzmetkeri basqarǵan kólik 1,5 jastaǵy balany qaǵyp ketip, sábı oqıǵa ornynda qaıtys boldy.