Qazaqstan musylmandary dinı basqarmasy tóraǵasy, Bas múftı Naýryzbaı qajy Taǵanuly elordada ótken baspasóz máslıhatynda el turǵyndaryn Qurban aıt merekesin ulttyq dástúrge saı atap ótýge shaqyrdy, dep habarlaıdy Egemen.kz.
Bas múftıdiń aıtýynsha, jyl basynda din qyzmetkerlerine joldaǵan baǵdarlamalyq baıandamasynda Qurban aıt pen Oraza aıtty qoǵamdyq deńgeıde, ulttyq qundylyqtardy dáripteı otyryp ótkizý qajettigi aıtylǵan.
Onyń sózinshe, aıt kúnderi respýblıka kóleminde «Qurban aıt – ulyq mereke» taqyrybynda túrli rýhanı-mádenı is-sharalar uıymdastyrylady. Oblystyq, qalalyq jáne aýdandyq meshitterdiń aýlasynda kıiz úıler tigilip, ulttyq sport túrlerinen jarystar ótedi. Sonymen qatar elimizdiń ár óńirinde mádenı jáne rýhanı keshter uıymdastyrylmaq.
Naýryzbaı qajy Taǵanuly barsha jamaǵatty ulttyq kıim kıip, aıt merekesin qazaqy dástúr men ulttyq naqyshta ótkizýge jáne uıymdastyrylatyn ıgi sharalarǵa belsendi qatysýǵa úndedi.
Aıta keteıik, Májilis depýtaty Qazybek Isa teris dinı aǵymdarǵa zańmen tyıym salýdy talap etti.