Qazaqstandyq aýyr atlet Zúlfııa Chınshanlo Tokıodaǵy Olımpııa oıyndarynda qola medal alyp, el qorjynyna kezekti júlde salǵanyn aıtyp, oqyrmannan súıinshi suraǵan edik. Bas basylymǵa suhbat bergen aýyratlet óziniń aldaǵy josparyn bólisti.
‒ Zúlfııa búgingi jetistigińe kóńiliń tola ma?
‒ Jetistigime shúkirshilik etemin. 2014 jylǵy álem chempıonatynan keıin mende aıtarlyqtaı jaqsy nátıje bolǵan joq. Eń bastysy, jaqsy emosııalardy sezinetin kez keldi. Rasynda, qýanyshtymyn.
‒ Serpe kóterýde úshinshi múmkindigińizdi nege paıdalanbadyńyz?
‒ Sebebi báribir qýyp jete almaıtyn edim. Jattyǵý jıyndarynda 130 kılony alańsyz kóterip júrdim. Biraq ol kezdegi salmaǵym 57 kılo edi. Olımpıadada 2-3 kılodaı salmaq qýǵannan keıin nátıje de tómendeıtini belgili. Sondyqtan táýekelge barǵan joqpyn. Onyń ústine ol salmaqtyń mańyzy da joq edi.
‒ Al julqa kóterýde tapsyrǵan salmaǵyńyzdy basyńyzdan úsh ret asyrsańyz da tóreshiler bir ǵana múmkindigińizdi esepke aldy. Muny nemen túsindiresiz?
‒ Aýyr atletıkada sál ǵana artyq qımyl jasasań, salmaqty esepke almaıdy. Tóreshilerdiń esepke almaýyna qolymdy tik ustamaǵanym, tepe-teńdikti saqtamaǵanym sebep boldy.
‒ Pandemııa sizdiń jattyǵýyńyzǵa qanshalyqty áser etti?
‒ О́zińiz kórgendeı barlyǵy jaqsy ótti. Pandemııa daıyndyǵymyzǵa aıtarlyqtaı áser etken joq.
‒ Elge degen sálemińiz...
‒ Barshańyzǵa alǵys bildiremin. Únemi janymnan tabylatyn kúıeýim men bapkerlerime rahmet. Bapkerlerim Vıktor Nı, Baqyt Ahmetovterge alǵysym sheksiz. Jankúıerlerge de erekshe rızashylyǵymdy bildiremin.
‒ Parıj Olımpıadasyna qatysasyz ba?
‒ Qazir azdap demalý kerek. Sonda barlyǵy belgili bolady. Negizi, 2024 jyly men 30-dan asyp ketedi ekenmin. Al ol jasta temir kóterý qıyn bolady. Sol sebepti 2024 jyly Olımpıadaǵa qatyspaıtyn sııaqtymyn.