29 tamyz ben 4 qyrkúıek aralyǵynda Fılıppınniń Pampanga qalasynda voleıboldan áıelder arasyndaǵy Azııa chempıonatynyń jalaýy jelbireıdi, dep jazady Egemen.kz.
Aıtýly jarys 1975 jyldan beri úzdiksiz uıymdastyrylyp keledi. Sol aralyqta 20 márte jalaýy jelbiregen dúbirli dodada Qytaı quramasy eń keremet nátıje kórsetti. Aspanasty eliniń arýlary 13 márte jeńis tuǵyrynyń eń bıik satysyna kóterildi. Bas júldeniń beseýin Japonııa óz qorjynyna saldy. Taǵy eki ret Taıland voleıbolshylarynyń baǵy jandy. Qazaqstannyń voleıbolshylary bir márte ǵana júldegerler qatarynan kórine aldy. 2005 jyly Taısan qalasynda ótken birinshilikte jerlesterimiz kúmis medaldi ıelengen edi.
Bıylǵy Azııa chempıonatynda jerlesterimiz A tobynda óner kórsetedi. Bastapqy kezeńdegi bizdiń qarsylastarymyz – О́zbekstan, Taıpeı jáne Fılıppın quramalary. Al V tobynda Ońtústik Koreıa, Iran jáne Aýstralııanyń arýlary sheberlik baıqasady.