Joǵary sanatty bilikti dáriger, ftızıatr Anna Sepke koronavırýstyń jańa túri - «Delta» shtamynyń qaýipti ekenin aıtty. Ftızıatrdyń aıtýynsha, bul shtamm qysqa ınkýbasııalyq kezeńmen sıpattalady jáne ózindik belgileri bar, dep jazady Egemen.kz Nur-Sultan qalasy ákimdiginiń resmı saıtyna silteme jasap.
«Juqtyrǵan sátten bastap 7 kún ishinde adamda klınıkalyq belgiler tez damyp, aýyr túrge aınalýy múmkin. Munda nazar aýdaratyn negizgi belgiler: JRVI-ge óte uqsas (tamaqtyń aýrýy, murynnan sý aǵýy, bas aýrýy). Sonymen qatar, koronavırýs sımptomy retinde bárimizge belgili ıis sezýdiń joǵalýy bul shtamda kezdese bermeıdi.
Sondaı-aq, Delta shtamynda tynys alý belgilerinen basqa, ishtiń aýyrsynýy, dıareıa, júrek aıný men qusý, býynnyń aýyrýyna nazar aýdarý kerek. Sarapshylar buǵan estý qabiletiniń joǵalýyn jáne tómengi aıaq tamyrlarynyń trombozyn qosady», deıdi dáriger.
Anna Sepke jedel respıratorlyq ınfeksııaǵa uqsas belgiler paıda bolǵan kezde (koronavırýspen aýyrǵandar sanynyń ósýin eskere otyryp) basqa aýrýlar týraly oılaýdyń qajeti joq ekenin atap ótti. О́zin-ózi oqshaýlap, tolyq tekseristen ótip, PTR-test tapsyrýy jáne mamandardyń keńesine qulaq asý kerek.
«Búgingi tańda «Delta» shtamy búkil álemde eń qaýipti vırýs bolyp sanalady. Bul shtamm búkil medısınalyq qaýymdastyqta úlken alańdaýshylyq týdyryp otyr. Bul vırýstyń tez juǵatyndyǵymen baılanysty. Eger koronavırýstyń burynǵy shtamdarynan ınfeksııa 1-den 4 adamǵa deıin juǵatyn bolsa, «Delta» nusqasynda - 1-den 7 adamǵa deıin», dep qosty spıker.
О́zińizdi qalaı oqshaýlaýǵa jáne qorǵaýǵa bolady degen suraqqa, joǵary sanatty dáriger ınfeksııanyń burynǵy túrlerinde saqtalǵan barlyq mańyzdy usynystardy qaıtalady.
«Barlyq aldyn-alý sharalaryn, betperde kııýdi, vaksınasııa alǵan jaǵdaıda ǵana ózińizdiń, týystaryńyz ben aınalańyzdaǵy adamdardyń densaýlyǵyn saqtaı alasyz dep qaıtalap aıtýdan jalyqpaımyz. Vırýs mýtasııaǵa ushyrap, kúsheıe tústi. Densaýlyǵyńyzǵa qaýip tóndirmeńiz. Eger ózińizdi qazir qorǵamasańyz, ekpe saldyrmasańyz, keıin kesh bolýy múmkin», dep qorytyndylady ftızıatr.