Eldegi qarjy aınalymynyń basty draıverine aınalǵan ekinshi deńgeıli bankterdiń menshik kapıtaly sońǵy bir jylda 7,6 paıyzǵa ósip, 4,03 trln teńgege jetken. 20 banktiń jaǵdaıy jaqsy bolsa, tórt bank mınýsta qalǵan.
Úzdik ondyqtyń kóshin «Otbasy bank» bastap tur. Jınaq bankiniń ósimi 34,8 paıyzǵa kóterilip, 335,8 mlrd teńge bolypty. Sondaı-aq úzdik úshtikte ATF Bank (+29,5 paıyz) pen «Alfa Bank» (+24,7 paıyz) bar. Eske salaıyq, ATF Bank byltyr jyl sońynda Jusan Bank-pen birigip ketken edi, degenmen prosess áli jalǵasýda.
Bank aktıvteri 20,9 paıyzǵa ósip, 34,04 trln teńgeni quraǵan. Finprom jobasynyń jazýynsha, bul da bank sektorynyń turaqtylyǵyn kórsetedi. Aktıvter kórsetkishi boıynsha da birinshi orynda – «Otbasy bank» (2,33 trln teńge). Bul rette «Sberbank» (+52,5 paıyz) pen Kaspi Bank-tiń de (+27,8 paıyz) úlesi mol. Aktıvter kólemi boıynsha úsh bankti reıtıngtiń antılıderleri dep ataýǵa bolady. Olar – ATF Bank, Capital Bank jáne qytaılyq ICBC enshiles banki. ATF jyl basynan beri 36 mlrd, Capital Bank 4,5 mlrd jáne ICBC 1,7 mlrd teńge joǵaltqan. Capital Bank-tiń maýsym aıynda lısenzııasynan aıyrylǵany belgili. Sondyqtan bul qarjy ınstıtýty sektorlyq statıstıkada sońǵy ret boı kórsetip otyr. Al ATF jyl sońyna deıin Jusan-men tolyqqandy qosylyp bitýi tıis, sodan keıin naryqtan birjola ketedi.
«Qazaqstandyq bankter «koronadaǵdarysqa» qaramastan zaım berýdi toqtatqan joq. Bir jylda ekinshi deńgeıli bankterdiń qaryz portfeli 11 paıyzǵa ósken, 16,73 trln teńgeni quraǵan. Degenmen barlyq qarjy uıymdary birdeı nesıe belsendiligin saqtaı almaı otyr. Sektor boıynsha tek 17 bank oń kórsetkishke ıe. Daǵdarysqa toly qıyn kezeńde ıpotekalyq segment – nesıe naryǵynyń draıverine aınaldy, al «Otbasy bank» qaryz portfeli boıynsha alda tur. Bir jylda 43,8 paıyzǵa ósim kórsetip, 1,51 trln teńgege jetken. Taǵy da «Sberbank» pen Kaspi Bank qaryz portfeli turǵysynan «Otbasy bankten» keıingi ekinshi, úshinshi oryndardy bólisedi» dep jazady Finprom. Capital (NPL 90+ úlesi 88,5 paıyzdy quraıdy), Jusan (54,9 paıyz) jáne «Eýrazııalyq banktiń» (9,2 paıyz) portfel sapasy edáýir nasharlaı túsken. Naryqtan ketken Pákistan banktiń ornyn basqan «Eýrazııalyq bank» mundaı antıreıtıngke alǵash ret enip otyr.
Salymdar boıynsha jyldyq ósim – 25,4 paıyz. Salym kólemi 23,83 trln teńgege jetti. Salymshylar qarjysyn jınaqtaý boıynsha RBK Bank alǵashqy orynda. Bul bank salymdaryn bir jylda eki eselep, 709,9 mlrd teńgege jetkizgen. Ekinshi oryndaǵy «Otbasy bank» salymy bir jarym ese kóbeıse, «Sberbank» salymdary 43,2 paıyzǵa artqan. Al bólshek salymdar boıynsha halyqtyń baspanaǵa degen bar qarjysyn jıyp otyrǵan «Otbasy bankpen» eshkim teńdese almaıdy. Bul qarjy uıymyndaǵy salymdar mólsheri 1,36 trln teńgege teń. Odan keıin Kaspi Bank (+37,8 paıyz) jáne «Bank SentrKredıt» (+26,8 paıyz).