3 tamyz saǵat 22:10-da Respýblıkalyq jedel-qutqarý jasaǵynyń kezekshi bólimine Reseıden kelgen týrıster tobyna qutqarýshylardyń kómegi qajet ekendigi týraly aqparat kelip túsken. Olardyń jalpy sany 15 adam, dep habarlaıdy Egemen.kz.
Bul týraly QR TJM resmı ókili Talǵat Ýálı habarlady.
Týrıster Sovetter shyńyna kóterilgen. Shyńdy baǵyndyrý kezinde olardyń biriniń jaǵdaıy kúrt nasharlaǵan. Alaıda top ishinde dáriger bolǵandyqtan, ol naýqastanǵan týrıstiń ót qabynda tas bolýy múmkin ekenin aıtqan.
Repsýblıkalyq jedel-qutqarý jasaǵynyń 8 qutqarýshysy men kınologııalyq top dereý izdestirý-qutqarý jumystaryna shyqty.
4 tamyzda týrıster Sovetter shyńynyń asýynan (teńiz deńgeıinen 3700 metr bıiktikte) tabyldy. Jaǵdaıy nasharlaǵan boıjetkenge alǵashqy medısınalyq kómek kórsetildi. Bul aımaqtaǵy taýly jer taıaz jáne tik jartasty shógindilerden turatyndyqtan, zardap shekken adamdy zembilmen tasymaldaýǵa kelmeıdi. Sebebi tasymaldaý kezinde qyzdyń jaǵdaıy odan ári nasharlaýy múmkin boldy. Almaty qalasynyń qutqarý qyzmeti áýe bortyn usyndy.
Aıta ketý kerek, bul top 29 shildede Respýblıkalyq jedel-qutqarý jasaǵynda tirkelgendikten qutqarýshylar týrısterdiń marshrýtyn bilgen. Bul izdeý ýaqytyn qysqartýǵa kómektesti.
Qazir qutqarýshylar áýe kemesin kútýde. Áýe kemesiniń kómegimen qutqarýshylar zardap shekken adamdy Úlken Almaty shatqalyndaǵy tikushaq alańynda kútip turǵan Apattar medısınasy ortalyǵynyń qyzmetkerlerine deıin jetkizedi.