Qaraǵandy oblysyndaǵy osydan 4 jyl buryn ashylyp, ýaqyt óte kele toqtap qalǵan metallýrgııalyq kremnıı óndiretin zaýyt qaıta iske qosylatyn boldy. Bul týraly «Qazaqstan» telearnasy habarlady.
Bul óndiristi qalpyna keltirý úshin «Qazaqstannyń ınvestısııalyq qory» men «Taý-Ken Samuryq» ulttyq taý-ken kompanııasy» AQ arasynda kelisim-shart jasaldy. Sońǵy atalǵan kompanııa alǵashqy kezeńde 1,5 mlrd. teńge bóletin boldy. Osy qarjy zaýyt eńbekkerleriniń jalaqy qaryzyn óteýge jáne óndiristegi múlikti saqtap qalýǵa jumsalatyn bolady.
«Arnaıy bıznes-jospar quramyz. Sonyń negizinde kásiporyndy qalypqa keltirý, tehnıkalyq aýdıt júrgizý jumystaryn júrgizemiz. Sodan keıin jumysshylardy jınaı bastaımyz. Munyń barlyǵyna kem degende 6 aı ýaqyt ketedi», - deıdi «Taý-Ken Temir» JShS dırektory Erbol Imanqulov.
«Sılısıým Qazaqstan» zaýyty elimizdegi «30 korporatıvti kóshbasshy» baǵdarlamasyna engizilgen biregeı kásiporyn bolatyn. Alaıda, 2010 jyly iske qosylǵanymen, eki jyldan soń jumysyn toqtatýǵa májbúr boldy. Sebebi, kompanııa basshylyǵy menedjmentti durys úılestire almady. Sonymen birge, Qazaqstan damý bankine qaıtarylmaǵan nesıe túrindegi bereshegi de bar. Zaýytta jumys istegen 400 adamnyń tek 35-i qalǵan.
«Qaraǵandylyqtar - naǵyz eńbek adamy. Qıyn jaǵdaılarǵa qashan da túsinistikpen qaraıdy. Kásiporyn jumysynyń turalap qalǵanyn jasyrmaımyn. Biraq, halyq sendi, kútti. Eshqaısysy dalada qalǵan joq, basqa jerlerge eńbekke tarttyq. Endi kásiporyn jumysy jolǵa qoıylǵan soń barlyǵy qaıtadan óz jumystaryna oralady», - dedi oblys ákimi Baýyrjan Ábdishev.
Zaýytty iske qosý úshin jańa basqarýshy kompanııaǵa 6 aı ýaqyt berildi. Kásiporyn jumysy jandanǵan sátte, qos peshten aıyna 50 myń tonna kremnıı óndirý múmkin bolatynyna mamandar senim bildirip otyr.
Danııar Túımebaı.
Derekkóz: «Qazaqstan» telearnasy
Foto: «Qazaqstan» telearnasy.