Parlament Senatynyń depýtaty Saǵyndyq Luqpanov Atyraý oblysyndaǵy Inder aýdanynda bolyp, aýyz sý óndirý sehynyń jumysymen, avtojanarmaı quıý stansalarynyń salyný barysymen jáne birqatar sharýa qojalyqtarynyń qyzmetimen tanysty, dep habarlady joǵarǵy Palatanyń baspasóz qyzmeti.
Senator fermerlermen kezdesý barysynda jemshóp daıyndaý jumystarynyń jaıyn talqylap, elimizdiń birqatar óńirinde bolǵan qurǵaqshylyq saldarynan mal azyǵynyń tapshylyǵyna baılanysty bul jumysty sapaly júrgizýdiń mańyzdylyǵyn atap ótti.
Senator sondaı-aq jergilikti turǵyndarmen aýdandaǵy ózekti máselelerdi talqylady. Olardyń qatarynda joldardyń jaı-kúıi, aýyz sýmen qamtamasyz etý, sondaı-aq pandemııaǵa qarsy is-qımyl sharalary men halyqty vaksınalaýǵa qatysty problemalar bar.
Saǵyndyq Luqpanov ótken sessııada senatorlar atqarǵan jumystar týraly aýyl turǵyndaryn habardar ete otyryp, máslıhat depýtattarynyń túrli salalardaǵy zańnamany jetildirý jónindegi usynystaryn da tyńdady.
Depýtat Mahambet aýdanynda 22 gektar jylyjaı qurylysynyń barysyn tekserdi. Ondaǵy jumysshylar senatorǵa bıyl 4 gektar jer paıdalanýǵa beriletinin habarlady. Jylyjaıdy tolyqqandy iske qosý jylyna shamamen 350 tonna qııar men qyzanaq óndirýge, sondaı-aq aýdan turǵyndaryn jumyspen qamtamasyz etýge múmkindik beredi.
«Aýyldy damytý úshin zamanaýı tehnologııalardy engizý ǵana emes, kadr tapshylyǵy problemalaryn sheshý, onyń ishinde jergilikti mamandardy daıarlaý mańyzdy bolyp otyr. Búgingi tańda jumys qoly jetispeıtin óńirlerdegi jaǵdaıdy jaqsartý úshin «Eńbek» memlekettik baǵdarlamasy iske asyrylyp jatyr», dedi Saǵyndyq Luqpanov.
Senator sonymen qatar polıetılen men polıpropılen óndirý jobasyn iske asyrý barysymen tanysty. «Qazaqstannyń 30 korporatıvtik kóshbasshysy» baǵdarlamasyna engen jobanyń óńir men sala úshin mańyzy zor. Ony iske asyrý nátıjesinde qurylys kezinde 3000-nan astam jumys ornyn jáne paıdalaný barysynda 500-den astam jumys ornyn ashý josparlanyp otyr.
Depýtat bul salany damytýǵa erekshe kóńil bólinip otyrǵanyn atap ótti. Senator jaqynda elimizdiń Premer-Mınıstriniń atyna depýtattyq saýal joldap, munaı-gaz hımııasy ónerkásibin damytý úshin naqty sharalar qabyldaýdyń mańyzdylyǵyn atap kórsteken bolatyn. Jaqynda Úkimet bıylǵy jyly elimizde munaı-gaz hımııasy salasyn damytý jónindegi ulttyq jobany ázirleý týraly sheshim qabyldady.