Búgin Premer-Mınıstrdiń orynbasary E. Toǵjanov elimizde buqaralyq jáne balalar sportyn damytýdyń qazirgi problemalary men perspektıvalary jóninde arnaıy keńes ótkizdi. Bul týraly Egemen.kz primeminister.kz-ke silteme jasap habarlaıdy.
Keńeske Mádenıet jáne sport mınıstri A. Raıymqulova, salalyq mınıstrlikterdiń, óńirler ákimdikteriniń basshylary jáne t. b. qatysty.
Memleket basshysynyń tapsyrmasyna sáıkes sport salasy odan ári reformalaýdy talap etedi.
Osyǵan baılanysty Premer-Mınıstrdiń orynbasary memlekettik organdardyń aldyna birqatar mańyzdy mindetter qoıdy. Buqaralyq jáne balalar sportymen aınalysýdyń qoljetimdiligin arttyrý úshin halyqtyń sportpen shuǵyldanýyn keminde 35% nátıjege jetkizip (búgingi kúni – 31,6%), kórsetkishterdi qaıta qaraý tapsyryldy. Ol úshin ákimdikterge memlekettik sporttyq tapsyrys kólemin ulǵaıtý, qosymsha balalar men jasóspirimder klýbyn, balalar-jetkinshekter sport klýbyn ashý, mektep jáne stýdentter sport lıgasynyń jumysyn qaıta bastaý esebinen balalarǵa arnalǵan tegin sport seksııalaryn keńeıtý tapsyryldy.
Sondaı-aq Qostanaı, Atyraý jáne Mańǵystaý oblystarynda sport mektep-ınternatynyń qurylysyn bastaý máselesin sheshý tapsyryldy. Sport obektilerin materıaldyq-tehnıkalyq jaraqtandyrý deńgeıin arttyrý, osy jyldyń sońyna deıin ákimdikterge 43 dene shynyqtyrý-saýyqtyrý kesheniniń qurylysyn aıaqtaý, Work-out alańdary men basqa da shyǵynsyz sport ǵımarattarynyń jelisin keńeıtý tapsyryldy. Sport nysandarynyń tolyq júktelýine erekshe nazar aýdarý eskertildi.
«Nur Otan» partııasynyń mamandandyrylǵan sport mektepteri oqytýshylarynyń jalaqysyn 2023 jylǵa deıin eki ese arttyrý, 2025 jylǵa deıin árbir aýyldyq okrýgti sport nusqaýshysymen qamtamasyz etý jónindegi jol kartasy is-sharalarynyń oryndalýyn erekshe baqylaýǵa alýdy tapsyrdy.
Úzdik halyqaralyq tájirıbeni eskere otyryp, kásibı sportshylardy, onyń ishinde ulttyq qurama komandalaryn daıarlaý tásilderin qaıta qaraý jáne buqaralyq, kásibı sport úshin sport mamandarynyń (sport psıhologtary, bıomehanıkter, bıohımıkter, dıetologtar jáne t. b.) tapshylyǵyn sheshýge arnalǵan baǵdarlama ázirleý tapsyryldy.
Sportqa baǵyttalatyn bıýdjettik jáne bıýdjetten tys qarajattyń tıimdi jumsalýyna qatań baqylaýdy qamtamasyz etý, 2025 jylǵa deıingi dene shynyqtyrý men buqaralyq sportty damytý jónindegi qabyldanǵan keshendi jospardy qaıta qaraý keregi sóz boldy.
Buqaralyq jáne balalar sportyn damytý máseleleri Úkimettiń erekshe baqylaýynda bolady.