Atyraý polıseıleri 50 epızodqa qatysty alaıaqtyq qylmysyn jasaǵan er adamdy ustady, dep jazady Egemen.kz.
Oblystyq polısııa departamenti baspasóz qyzmetiniń aqparatyna qaraǵanda, Shymkent qalasynyń turǵyny 50 adamǵa páterdi jalǵa berip, 1 mıllıonnan astam teńgeni qaltasyna basqan.
«Kúdikti OLH jelisi arqyly habarlandyrý jarııalap, birneshe qalanyń turǵyndaryna ýáde berip, aldyn-ala tólem jasatqan. Keıin er adam izim-qaıym joǵalyp ketken. Alaıaqqa aldanǵandardyń biri – atyraýlyq áıel polısııaǵa shaǵym túsirdi. Oblystyq polısııa departamentiniń qyzmetkerleri alaıaqty «Anti-fraud» jedel aldyn alý is-sharasy kezinde anyqtady. Tekserý kezinde Shymkent qalasynyń 1989 jyly týǵan turǵynynyń 50 epızodtyq qylmysy ashylǵan. Buryn sotty bolǵan er adam óz kinásin moıyndady» dep habarlady departamenttiń baspasóz qyzmeti.
Qazir kúdiktige qatysty QR Qylmystyq Kodeksiniń 190-babynyń 2-bólimi, 4-tarmaǵymen sotqa deıingi tergeý bastaldy. Kúdikti ýaqytsha ustaý ızolıatoryna qamaýǵa alyndy.