Memleket basshysy saltanatty jıyndaǵy sózinde, «bul – Qazaqstannyń koreı jurtyna degen shynaıy yqylasy men zor qurmetiniń belgisi» dep atap ótti, dep jazady Egemen.kz Aqordaǵa silteme jasap.
«Mundaı is-sharalardyń tarıhı mán-mańyzy aıryqsha. Qazaqtar da, koreıler de Táýelsizdiktiń qadir-qasıetin jaqsy túsinedi. Hon Bom Do – Koreıanyń azattyǵy úshin kúresken biregeı tulǵa. Naǵyz batyr, shynaıy otansúıgish. General taǵdyrdyń jazýymen ómiriniń sońǵy jyldaryn qazaq jerinde ótkizdi. Sodan beri qansha jyl ótse de atajurtynda batyrdyń erligi umytylǵan joq. Ony bizdiń halqymyz da jaqsy biledi. Qyzylorda qalasynda Hon Bom Donyń qurmetine memorıal turǵyzylǵan. 2018 jyly batyrdyń týǵanyna 150 jyl toldy. Qazaqstan halqy Assambleıasy osyǵan oraı arnaıy konferensııa ótkizdi. Generaldyń esimi qazaq eliniń jadynda saqtalady. Onyń memorıaly memleket qamqorlyǵynda bolady», dedi Qazaqstan Prezıdenti.
Qasym-Jomart Toqaev kezinde koreı ultynyń kóptegen ókili Qazaqstanǵa eriksiz qonys aýdarǵanyn, olardyń arasynda Ge Bon Ý, Saı Den Hak, Kım Man Sam sııaqty tanymal tulǵalar baryn atap ótti.
«Jer aýdarylǵan koreılerdi halqymyz baýyryna basyp, panalatty. Olar qazaq elinde ósip-ónip, naǵyz otandastarymyzǵa aınaldy. Bizdiń elde ár etnostyń óz tamyrynan ajyramaı, tili men dilin saqtaýyna barlyq jaǵdaı jasalǵan. Koreı dıasporasy da osy ıgilikti kórip otyr. Elimizde Qazaqstan koreıleriniń qaýymdastyǵy bar. Koreı mádenı ortalyqtary men Koreı teatry jumys isteıdi. Sondaı-aq, koreı tilinde gazet shyǵady. Koreı baýyrlarymyz kóptegen salada tabysty eńbek etýde. Olardyń el ekonomıkasyn órkendetýge qosyp jatqan úlesi zor. Qazaqstanda turatyn koreıler eki eldiń qarym-qatynasyn damytýǵa da belsendi atsalysyp júr. Bizdiń yntymaqtastyǵymyz bolashaqta osyndaı dostyq rýhta nyǵaıa beredi dep senemin», dedi Qasym-Jomart Toqaev.
Qasym-Jomart Toqaev Koreıa Respýblıkasynyń Prezıdenti Mýn Chje Inge Koreı halqynyń ulttyq batyry Hon Bom Donyń qabirinen alynǵan topyraqty tabystady.
Koreıa Respýblıkasynyń Prezıdenti Mýn Chje In Qasym-Jomart Toqaevqa zor rızashylyǵyn bildirip, ult batyry Hon Bom Doǵa eń joǵary memlekettik nagrada berilgenin habarlady.