Qasym-Jomart Toqaev pen Mýn Chje In BAQ ókilderi úshin brıfıng ótkizdi, dep jazady Egemen.kz Aqordaǵa silteme jasap.
Qasym-Jomart Toqaev Koreıa Respýblıkasyna shaqyryp, shynaıy yqylaspen qarsy alǵany úshin Prezıdent Mýn Chje Inge rızashylyq bildirip, bul memlekettik saparǵa erekshe mán beretinin atap ótti.
«Eki eldiń arasy alshaq bolǵanymen, halyqtarymyz – taǵdyrlas. Koreıa – Qazaqstannyń Shyǵys Azııadaǵy strategııalyq seriktesiniń biri. Qazir san salaly baılanysymyz qarqyndy damyp kele jatyr. Biz búgin osy qarym-qatynasty jańa deńgeıge kóterý úshin ózara senim men qoldaýǵa negizdelgen kelissózder júrgizdik. Yqpaldastyqtyń tyń baǵyttaryn aıqyndadyq», dedi Qazaqstan Prezıdenti.
Memleket basshysy ótken ǵasyrdaǵy tarıhı oqıǵalardyń eki halyqty jaqyndata túskenine toqtaldy.
«Ondaǵan myń koreı qazaq jerinen pana tapty. Qazaqstan olardyń ekinshi Otanyna aınaldy. Koreı jurtynyń ulttyq batyry, general Hon Bom Do Qyzylorda qalasynda jerlengenin jaqsy bilesizder.Prezıdent Mýn Chje Inniń ótinishimen onyń súıegi meniń sheshimimmen týǵan jerine jetkizildi. Bul shara – bizdiń elderimizdiń arasyndaǵy ózara senimniń jarqyn kórinisi. Kezinde Qazaqstanǵa jer aýdarylǵan koreılerdiń urpaǵy búginde 100 myńnan asty. Olar memleketterimizdiń dostyq qatynasyn nyǵaıta túsýge zor úles qosyp keledi», dep atap ótti Qasym-Jomart Toqaev.
Memleket basshysy brıfıngte óńirlik jáne halyqaralyq máseleler boıynsha pikir almasyp, negizgi túıtkilderdi talqylanǵandaryn, sondaı-aq, birneshe mańyzdy kelisimge qol qoıylǵanyn aıtty.
«Qazaqstan Koreıamen seriktestikti jan-jaqty damytýǵa basa mán beredi. Biz ózara tıimdi áriptestikti joǵary baǵalaımyz.Yntymaqtastyqty tyń qarqynmen jalǵastyrýǵa múddelimiz. Búgin qabyldanǵan Keńeıtilgen strategııalyq seriktestik týraly birlesken málimdeme – sonyń aıqyn dáleli. Bul qujat qazaq-koreı yqpaldastyǵynyń aıasyn keńeıtip, qarym-qatynasymyzdy jańa beleske kóterýge septigin tıgizedi dep senemin. Ekijaqty baılanystardyń ózegi – saýda-ekonomıkalyq yntymaqtastyq.Koreıa – joǵary tehnologııasy men ınnovasııalyq ónerkásibi damyǵan qýatty memleket. Qazaqstan – ekonomıkalyq ósimi turaqty, ári ınvestısııalyq ahýaly qolaıly el. Qazirdiń ózinde «Tańǵy shyq eli» Azııadaǵy saýda seriktesterimizdiń ishinde ekinshi orynda tur. Buǵan qosa, Koreıa elimizdegi eń iri 10 ınvestordyń qataryna kiredi», dedi Qazaqstan Prezıdenti.
Qasym-Jomart Toqaev sońǵy 15 jylda Koreıa Qazaqstan ekonomıkasyna 6 mıllıard dollardan astam ınvestısııa salǵanyn, «Samsung», «Hyundai» jáne «Lotte Group» konsernderi – bizdiń iri ınvestorlarymyz ekenin atap ótti.
«О́tken jyldyń qorytyndysy boıynsha eki eldiń saýda-sattyq kólemi 5,9 mıllıard dollarǵa jetti. Aldaǵy meje – osy kórsetkishti aıtarlyqtaı arttyrý. Búgin biz pandemııadan keıingi kezeńde shıkizattyq emes taýar aınalymyn ulǵaıtyp, ony ártaraptandyrýǵa kelistik. Sondaı-aq, «Samal jel» baǵdarlamasyn jandandyrýǵa ýaǵdalastyq. Osy arqyly jańa ınvestısııa men joǵary tehnologııanyń elimizge kelýine qolaıly jaǵdaı jasaımyz.
Biz túrli baǵyttaǵy aýqymdy jobalardy birlese júzege asyrýdyń múmkindikterin qarastyramyz. Bul rette, aýyr ónerkásip pen mashına jasaý, taý-ken jáne barlaý, balamaly energetıka salalarynyń bolashaǵy zor. Qazaqstanda ınnovasııalyq óndiristerge degen suranys joǵary. Ásirese, kommýnıkasııa, aýyl sharýashylyǵy, medısına jáne farmasevtıka jobalaryna basa mán beremiz», dedi Memleket basshysy.
Ekijaqty yqpaldastyqqa tyń serpin berý úshin Koreıa Respýblıkasynyń Pýsan qalasynda Qazaqstannyń Bas konsýldyǵyn ashý týraly sheshim qabyldandy.
«Bul – seriktestigimizdi strategııalyq rýhta damytýdyń taǵy bir joly. Kelesi jyly Qazaqstan men Koreıanyń dıplomatııalyq qatynas ornatqanyna 30 jyl tolady. Osy oraıda biz mádenı-gýmanıtarlyq baılanystardy kúsheıtip, naqty is-sharalar ótkizý mańyzdy ekenin atap óttik», dedi Qasym-Jomart Toqaev.