Qazaqstan halqynyń birligi merekesi qarsańynda oblys ákimi Sergeı Dıachenkonyń qatysýymen kishi Assambleıa músheleriniń dóńgelek ústel basyndaǵy májilisi ótkizildi. Oblystyń jańa basshysy elimizdegi qýatty qoǵamdyq uıymnyń Qazaqstan damýyndaǵy úles-qarymyn joǵary baǵalap, aldaǵy birlesip atqarar jumys josparlaryn talqyǵa saldy.
Bıyl óziniń 20 jyldyǵyn atap ótetin etnomádenı birlestikter Assambleıanyń qyzmet aýqymyn keńitýde aıryqsha belsendilik tanytty. Olar dostyq pen yntymaq negizi memlekettik qundylyqtarǵa qurmet sezimin qalyptastyrýda dep biledi jáne osy baǵytta belsendi is-qımyldardyń uıytqysy sanalady. Assambleıa qyzmetin jandandyrýǵa ákimdik tarapynan jan-jaqty qoldaý kórsetiletindigine rızashylyq bildirildi. Máselen, ótken jyly bul maqsatqa 46 mıllıon teńge jaratylsa, 2010 jyldyń bıýdjetinde ony 52,4 mıllıon teńgege ulǵaıtýǵa sheshim qabyldanyp otyr. Assambleıanyń jastar qanaty da ónegeli isterdiń jarshysyna aınala bildi. Qazir Kókshetaýdyń 26 mektebinde jastar uıymy jumys atqarady. Oblys ákimi bul baǵytta “Nur Otan” HDP oblystyq fılıalymen tyǵyz baılanys ornatý qajettigin eske saldy.
Oblystyq koreı etnomádenı birlestiginiń jetekshisi Moıseı Chjen aqsaqal Elbasy N.Nazarbaevtyń jýyrdaǵy Koreıaǵa sapary qazaqstandyq otandastaryn qýanyshqa bólep, erteńgi kúnge senimin ushtaǵanyn atap ótti. Ol kishi Assambleıanyń jańa tóraǵasy, elimizge belgili qoǵam qaıratkeri S.Dıachenkonyń dostyq baıraǵyn jelbiretýdegi qyzmetine tabystar tiledi.
Cheshen-Ingýsh birlestiginiń tóraǵasy Gerıhan Iаndıev elimizdegi dinı qaýymdastyqtar arasyndaǵy baılanystardyń álemdik úlgisi qalyptasqandyǵyn maqtanyshpen tilge tıek etse, nemis etnomádenı birlestiginiń tóraıymy Qazaqstannyń álemdik joǵary bedeliniń arqasynda shet el qaýymdastyǵynyń bizge qyzyǵýshylyq tanytyp, arnaıy granttar bóle bastaǵanyn atap kórsetti. Ulttyq birlestikterdiń ǵylymı úılestirýshisi Nına Mıtchınova, oblystyq muraǵat dırektory Aleksandr Polojensov etnos ókilderiniń oqýy, jastarǵa bilim granttarynyń bólinýi, aımaqtyq semınarlarǵa qatysý, ulttyq óner mamandarynyń tapshylyǵy máselelerin kóterdi.
Kezdesý jurtty eleń etkizgen oqıǵamen aıaqtaldy. Oblystyq Kabardın-Balkar etnomádenı birlestiginiń basshysy, Eńbek Eri Ibragım Janǵorazov aqsaqal ózi basqaratyn JShS qaraýyndaǵy 160 oryndyq balalar baqshasyn, aýyldyq-dárigerlik ambýlatorııa men ashana ǵımarattaryn kommýnaldyq menshikke tegin ótkizetinin málimdedi.
Oblys ákimi S.Dıachenko ulttyq birlestikterdiń birneshe ókilin jeke suraqtary boıynsha qabyldady.
Baqbergen AMALBEK, Aqmola oblysy.