Aýǵanstandaǵy ishki saıası ahýaldyń shıelenisýine baılanysty Birikken Ulttar Uıymy (BUU) óziniń Aýǵanstanǵa járdem kórsetý jónindegi mıssııasyn (UNAMA) jáne AIR-da akkredıttelgen BUU-nyń basqa da agenttikterin Almaty qalasyna ýaqytsha ornalastyrý týraly Qazaqstanǵa ótinish bildirdi.
Qazaqstan men BUU-nyń jan-jaqty ózara is-qımyly rýhy sheńberinde jáne osy uıymnyń tolyq quqyqty múshesi retindegi mindettemeleri aıasynda Prezıdent Qasym-Jomart Toqaev BUU ótinishin qoldaý týraly sheshim qabyldady.
18 tamyzda UNAMA qyzmetkerleri bar alǵashqy bort Almaty áýejaıyna qondy. SIM Almaty ákimdigi, quzyretti vedomstvolar jáne qyzmettermen birlesip, olardy ornalastyrý boıynsha jedel túrde qajetti sharalardy qabyldaýda. Kelgen qyzmetkerler – halyqaralyq dıplomattar, BUU pasporttary men ımmýnıtetteriniń ıegerleri.
Almatyda UNAMA jáne basqa da BUU agenttikteriniń keńselerin ornalastyrý jáne olardyń odan ári qyzmet etýi ýaqytsha, ıaǵnı Aýǵanstandaǵy jaǵdaı turaqtalǵanǵa deıin, shamamen jarty jylǵa sozylady dep uıǵarylyp otyr.
Qyzmetkerlerdiń keńse men úı-jaılardy jalǵa alýy sııaqty shyǵystarynyń barlyǵy tolyǵymen BUU-nyń bıýdjetinen qarjylandyrylady, dep habarlady elimizdiń Syrtqy ister mınıstrligi.
«Egemen-aqparat»