UQShU-nyń (quramyna Qazaqstan, Reseı, Armenııa, Belarýs, Qyrǵyzstan men Tájikstan kiretin Ujymdyq qaýipsizdik týraly shart uıymy) Ujymdyq qaýipsizdik keńesi 23 tamyzda kezekten tys sessııa ótkizip, Aýǵanstandaǵy jaǵdaıdy talqylaıdy. Bul týraly UQShU baspasóz hatshysy Vladımır Zaınetdınov aıtty, dep habarlaıdy Egemen.kz.
«2021 jyly 23 tamyzda Ujymdyq qaýipsizdik týraly shart uıymy Ujymdyq qaýipsizdik keńesiniń kezekten tys sessııasy beınekonferensbaılanys arqyly ótedi dep josparlanǵan. Onyń barysynda Aýǵanstandaǵy jaǵdaı men onyń UQShU-ǵa múshe elder qaýipsizdigine áseri talqylanady», dedi ol.
Aıta keteık, sońǵy aptalarda Aýǵanstandaǵy jaǵdaı kúrdelene tústi, Talıban qozǵalysy iri qalalardy basyp aldy. 15 tamyzda buqaralyq aqparat quraldary men aqparat kózderi shekaranyń barlyq ótkeli baqylaýda ekenin habarlady. Sol kúni sodyrlar Kabýlǵa kirip, prezıdent saraıyn basyp alǵanyn málimdedi.