«Delta» shtamy álemniń túkpir-túkpirinde joǵary qarqynmen tarap jatyr. Sonyń saldarynan birqatar elde koronavırýsqa shaldyqqandardyń sany boıynsha antırekord tirkeldi.
Máselen, Fılıppınde bir táýlikte 17 231 adamnyń naýqastanǵany anyqtalǵan. Al Vetnamda 11 321 jaǵdaı tirkelgen. Aýstralııada da ahýal máz emes. Qurlyqta indet juqtyrǵandar sany artyp, búginde myńnan asyp jyǵyldy.
Sıdneıde Covid-19 naýqastary sanynyń ósýine baılanysty karantın taǵy bir aıǵa uzartyldy. Dúısenbi, 23 tamyzdan bastap kúshine enetin jańa shekteýlerdiń ishinde megapolıstiń 12 aýdanynda 21.00-den 05.00-ge deıin komendanttyq saǵat engizildi. Sondaı-aq úıden tys jerde maska taǵý talap etiledi.
Osyǵan baılanysty Aýstralııada karantınge qarsy narazylyq aksııalary ótti. Sıdneıde 47 adam qamaýǵa alyndy, taǵy 260 adamǵa aıyppul salyndy. Shtattyń polısııa jáne tótenshe jaǵdaılar mınıstriniń aıtýynsha, narazylar sany kóp emes ekenine qaramastan, olar ınfeksııanyń taralýyna sebep bolýy múmkin. Sondyqtan sherýge shyqqandarǵa osyndaı jaza qoldanylyp otyr.
AQSh-ta jalǵan vaksına saldyrýmen kúres bastaldy. Kedendik jáne shekaralyq baqylaý qyzmetkerleri 3 myńnan astam jalǵan Covid-19 sertıfıkatyn tárkiledi. Vaksına pasporttary Ankorıdj portyna kelgen. Jiberýshiniń mekenjaıy – Qytaı. Jalǵan qujattar AQSh-tyń Aýrýlardy baqylaý jáne aldyn alý ortalyǵynyń anyqtamalarynan kóshirilgen. Biraq onyń sapasy tómen.
Jalpy, muhıttyń arǵy betinde de jalǵan pasport jasatatyndar tyıylmaı tur. Buǵan deıin Tennesı shtatyndaǵy kedenshiler osyǵan uqsas 3 myń qujatty tárkilegen bolatyn.
Vaksına qabyldamaýdyń saldary densaýlyqqa teris áserin beredi. AQSh-tyń Ońtústik Mıssısıpı shtatynda Covid-19 juqtyrǵandar sany kóbeıip ketti. Aýyr jaǵdaıdaǵy naýqastarǵa arnalǵan aýrýhanalardaǵy oryndar tolyp qaldy. Qarqyndy terapııa palatalary pasıentterge lyq toly. Aýrýǵa shaldyqqandar kútý zaldaryna jáne medısınalyq mekemelerdiń dálizderine ornalastyrylyp jatyr.
Ýnıversıtettiń medısınalyq ortalyǵynyń garajdaryna eki dalalyq aýrýhana ornalastyrylǵan. О́ıtkeni shtat bıligi halyqtan vaksına saldyrýdy talap etpeıdi. Sondyqtan qazirgi tańda Mıssısıpı shtaty ujymdyq ımmýnıtetti qalyptastyrýda eń sońǵy orynda tur. Sonyń saldarynan «Delta» shtamy tez taralyp, naýqastar sany kóbeıip barady.
Elde koronavırýs juqtyrǵandar sany artýyna baılanysty Federaldy densaýlyq saqtaý organdary Pfizer nemese Moderna vaksınalarynyń tolyq komponentin alǵandarǵa úshinshi márte ekpe saldyrýdy usyndy. О́ıtkeni AQSh-ta indettiń kezekti tolqyny bastaldy. Qazirgi tańda naýqastar sany kún sanap artyp barady.
Áıtse de keı ǵalymdar muny qoldamaıdy. Olardyń paıymdaýynsha, úshinshi dozanyń tıimdiligi týraly málimet jetkiliksiz. Sondyqtan bar derekter naqtylanbaıynsha asyqpaýǵa shaqyrdy.
AQSh-tyń bul qadamyn Dúnıejúzilik densaýlyq saqtaý uıymy qatań synǵa aldy. О́ıtkeni Afrıka sekildi álemniń kelesi bir bóliginde múldem vaksına saldyrmaǵandar óte kóp. Sondyqtan uıym AQSh bıliginen tek ózderin ǵana oılamaı, basqalarǵa da vaksına berýdi surap otyr.
Aıta keterligi, AQSh-taǵy indettiń qazirgi joıqyn tolqyny «vaksınasyz pandemııa» dep atalady. О́ıtkeni naýqastardyń deni – vaksına saldyrmaǵandar. Sondaı-aq ekpe alǵan adamdardyń ólimi óte sırek kezdesedi.
Reseıdiń joǵary oqý oryndary sheteldik stýdentterdi de vaksınamen qamtamasyz etpek. Ýnıversıtetter men ınstıtýttardyń shetelden kelgen stýdentteri ekpe alýǵa usynys bildirýi qajet. Reseı Federasııasy Bilim jáne ǵylym mınıstrliginiń basshysy Valerıı Falkov barlyq sheteldik stýdent Reseıge oqýǵa kelip, vaksına saldyra alady dep málimdedi.
Tallınde oqýshylarǵa koronavırýsqa qarsy ekpe salý bastaldy. Vaksınalaý 21 jáne 22 tamyz kúnderi Tallınniń alty mektebinde aldyn ala tirkeýsiz ótti. Ekpege birinshi kezekte 12-18 jastaǵy oqýshylar, sondaı-aq olardyń otbasy músheleri shaqyryldy.
Chernogorııa epıdemııalyq jaǵdaıdyń nasharlaýyna baılanysty sheteldikterdiń elge kirý sharttaryn qatańdatty. Sondaı-aq elde ashyq aspan astynda 50-den astam eresek adamnyń jınalýyna tyıym salyndy. Budan bólek, PTR testi jáne vaksınalaý sertıfıkatynsyz týrısterdi demalys oryndaryna kirgizbeıdi. Elge kirý erejelerin qatańdatý koronavırýstyń «Delta» shtamynyń taralýyna baılanysty. 10 qyrkúıekten bastap kúshine enetin talapqa sáıkes týrıster Covid-19 testiniń teris nátıjesi, vaksına alǵanyn nemese koronavırýspen aýyrǵanyn rastaýǵa tıis. Qazirgi ýaqytta Reseıden jáne birqatar basqa memleketten kelgen týrıster Chernogorııaǵa eshqandaı shekteýsiz kire alady.
Djakarta koronavırýsqa qarsy vaksınanyń 7,5 mln dozasyn aldy. Nıderland 450 myń doza AstraZeneca vaksınasyn jiberse, Pfizer kompanııasy 1,5 mln doza bólgen. Indonezııa sonymen qatar Sinovac jáne AstraZeneca kompanııalarynan koronavırýsqa qarsy vaksına satyp alady. Sinovac 5 mln doza jiberse, al AstraZeneca – 567 myń doza jóneltken. Tamyz aıynyń basynan beri elge 22 792 480 doza vaksına kelip tústi. El bıligi ekonomıkalyq ósýdiń kilti vaksınalaý jáne koronavırýsty juqtyrý jaǵdaılaryn boldyrmaý ekenin aıtyp otyr.
Kosovo juqpaly aýrýlarǵa qarsy aýrýhanalary endi naýqastardy qabyldaı almaıdy. Kún saıyn koronavırýs tasymaldaýshylarynyń sany júzdegen esege kóbeıdi. О́tken táýlikte oblysta Covid-19 juqtyrǵan 2 236 jaǵdaı tirkeldi. Bul – antırekord. Bir aıdyń ishinde vırýs tasymaldaýshylar sany birneshe júzden 10 myńǵa deıin kóterilip, ósý kórsetkishi ulǵaıdy. Aýrýhanaǵa túsken pasıentterdiń 90 paıyzy ottegi ballonymen demalyp jatyr. Olardyń barlyǵy vaksınalanbaǵan. Qazirgi ýaqytta 221 myń turǵyn ekpeniń tolyq komponentin aldy. Osyǵan baılanysty jaǵdaıdy baqylaý úshin bılik jańa shekteýler engizdi.
Vetnamda koronavırýstyń jańa tolqyny bastaldy. Bir kún buryn elde Covid-19-dyń jańa táýliktik eń joǵary kórsetkishi tirkeldi – 10 654 jaǵdaı. Aldyńǵy rekordtyq ósim 14 tamyzda tirkelgen edi. Ol kezde 9 716 adam naýqastanǵan-dy. Infeksııanyń jańa faktileriniń ishinde 15 jaǵdaı syrttan tasymaldanǵan. Búgingi tańda koronavırýs juqtyrǵan vetnamdyqtardyń jalpy sany 312 611-ge jetti, olardyń 7150-i qaıtys boldy. Sonymen qatar osy ýaqytqa deıin eldiń 94,5 mln-nan astam turǵynynyń tek 15,9 mln vırýsqa qarsy vaksına alǵan.
Ázerbaıjanda kovıd-pasporty bolmaǵan jaǵdaıda qoǵamdyq oryndarǵa barǵan adamdarǵa aıyppul salynady. Jeke tulǵalar úshin aıyppul 235 deıin, zańdy tulǵalar úshin 2 950 dollarǵa deıin jetedi. Osylaısha, 1 qyrkúıekten bastap saýda ortalyqtarynda, qonaqúılerde, dámhanalar men meıramhanalarda tek kovıd-pasporty bar adamdarǵa ǵana qyzmet kórsetiledi. Qujat 18 jastan asqan barlyq adamnan, sonyń ishinde stýdentterden de talap etiledi. Vaksınalanýdy rastamaı, tek qarapaıym dúkenderge barýǵa bolady.
Belgııada vaksınalaý naýqany qarqyndy júrip jatyr. Osylaısha, koronavırýsqa baılanysty jarııalanǵan karantın talaptaryn jeńildetýge múmkindik týdy. Osy ýaqytta 7 mln 796 myń belgııalyq koronavırýsqa qarsy vaksına aldy. Bul – el halqynyń jasy 18-den asqan turǵyndarynyń 80 paıyzy.
«Búgingi tańda eresek 10 adamnyń segizi vaksına alǵan. Osylaısha, biz «jazǵy jospardy» asyra oryndadyq jáne bıylǵy 1 qyrkúıekten bastap bostandyqqa mańyzdy qadam jasaımyz», dedi Belgııanyń premer-mınıstri Aleksandr De Kroo.
Brazılııada sońǵy 24 saǵat ishinde 28 388 jańa koronavırýstyń rastalǵan jaǵdaıy tirkeldi, 698 adam qaıtys boldy. Pandemııa bastalǵannan beri Brazılııada 20 mln astam adam qaterli derttiń tyrnaǵyna ilikti. О́lim sany 574 209-ǵa jetti.
Fransııanyń ishki ister mınıstrligi senbide shamamen 175 500 adam demonstrasııaǵa shyqqanyn habarlady. Biraq adamdar jazǵy demalystan oralǵan kezde olardyń sany artýy múmkin.