Elordada Qazaqstan Táýelsizdiginiń 30 jyldyǵyna, Ybyraı Altynsarınniń 180 jyldyǵyna jáne Ybyraı Altynsarın atyndaǵy Ulttyq bilim akademııasynyń 100 jyldyǵyna arnalǵan «Nur-Sultan - Qostanaı» velomarafony bastaldy, dep habarlaıdy Egemen.kz.
QazAqparat agenttiginiń málimetinshe, velomarafonǵa qatysýshylardyń deni zeınetkerler. Olar bir aptada Qostanaıǵa jetýdi josparlap otyr.
«Biz velomarafondy Nur-Sultanda bastap, Qostanaıǵa keminde 750 shaqyrym jol júrýdi josparlap otyrmyz. Búgin Astrahan, Jaqsy, Oktıabr, Áýlıekól aýyldary arqyly ketemiz. Aıta ketý kerek, bizde materıaldyq qyzyǵýshylyq joq. Maqsatymyz - Ybyraı Altynsarınniń týǵan jerine barý, eskertkishin, sondaı-aq Qostanaıdaǵy murajaıyn aralaý. Sonymen qatar qalada onyń atyndaǵy mektep-gımnazııa bar, soǵan barǵymyz keledi», dedi uıymdastyrýshysy jáne qatsyýshysy Ernat Melisuly.
Marafon uıymdastyrýshysy elordadan qazaq aǵartýshysyna eskertkish qoıýdy usyndy.
«Biz bárimiz Ybyraı Altynsarındi qazaqtyń tuńǵysh muǵalimi retinde bilemiz. Uly aǵartýshysy qazaq rýhanııatynda erekshe oryn alady. El astanasy Nur-Sultan qalasynda bul kórnekti tulǵanyń eskertkishi áli ornatylmaǵan. Kóshe bar, biraq qysqa, nebary 700 metr. Kelip gúl qoıýǵa bolatyn arnaıy eskertkish bolsa jaqsy bolar edi. Bıyl Táýelsizdiktiń 30 jyldyǵy, qalanyń astana bolǵanyna 20 jyldan asty, osyǵan baılanysty elordanyń ortalyǵynda Ybyraı Altynsarın eskertkishin ornatý, ádemi jáne keń kóshege esimin berý týraly usynys bar. Elorda jyl saıyn ósip keledi, sáıkesinshe jańa kósheler paıda bolady. Sondyqtan jańa jáne keń kóshe tabý qıyn bolmaıdy dep oılaımyn. Bul saýapty is bolar edi», deıdi ol.
Aıta keteıik, velomarafon Ilııas Esenberlın kóshesindegi 20/1 - Ybyraı Altynsarın eskertkish úıinen bastaldy.