Qazaqstannyń Nomad Stunts kaskaderleri áıgili amerıkalyq akter Semıýel L.Djeksonmen birge «Kıller kodeksi» fılmine tústi.
Aıta keteıik, Gollıvýdtyń «Kıller kodeksi» fılmi álemdik prokatqa shyqqan bolatyn. Onda basty rólderdi Semıýel Leroı Djekson, Meggı Kıý jáne Maıkl Kıton oınaıdy. Sonymen qatar fılmdi túsirý jumysyna Nomad Stunts tobyndaǵy qazaqstandyq kaskaderler de qatysqan.
«Jobada, jalpy Nomad Stunts tobynyń 10 kaskaderi óner kórsetti. Aıta keterligi, kaskaderler ekshnge ǵana jumyldyrylmaı, qıyn epızodtarda basty keıipkerler rólin somdady. Sondaı-aq epızodtyq sahnalarǵa akter retinde de qatysty», deıdi top músheleri.
Qazaqstandyq akterler bandıtterdiń, bosqyndar men oqqaǵarlardyń, shekarashylar men beıbit turǵyndardyń rólinde oınady. Týyndy rejısseri «Roıal kazınosy», «Zorra maskasy», «Jatjurttyq» syndy fılmdermen jumys istegen Martın Kempbell boldy. Túsirilim jumystary Rýmynııada ótti.