Qazaqstannyń avtobıznes qaýymdastyǵynyń málimetine súıensek, osy jyldyń 7 aıynda el aýmaǵynda jalpy quny 371,4 mlrd teńgege 47 176 tehnıka óndirilgen. Bul – 2020 jyldyń qańtar-shildesindegi kórsetkishten 23,8 paıyzǵa joǵary.
Qaýymdastyqtyń habarlaýynsha, elimizdiń avtoónerkásip salasy mashına jıyntyqtarynyń tapshylyǵyna jáne Qytaı arqyly tasymaldanatyn júk jetkizilimderiniń shektelýine baılanysty qıyndyqqa tap bolǵan. Degenmen resmı derekter boıynsha, avtoónerkásip mashına jasaý salasynyń 32 paıyzyn ıelenip, salany damytýdyń negizgi draıveri atanyp otyr.
2021 jylǵy qańtar-shildede 40 674 jeńil avtomobıl (ósim 26,6 paıyz), 5 302 júk kóligi (ósim 52,1 paıyz), 705 avtobýs (nátıje 17,5 paıyzǵa kemigen), 376 tirkeme jáne jartylaı tirkeme, 119 basqa da mamandandyrylǵan tehnıka shyǵarylǵan.
Qazaqstandaǵy kásiporyndarda óndirilgen eń tanymal brendter: Chevrolet (18 362 birlik), Hyundai (14 322 birlik), Kia (5 211 birlik) JAC (3 253 birlik), GAZ (2 456 birlik), UAZ (940 birlik), KAMAZ (824 birlik), Lada (394 birlik), Hyundai Trucks (301 birlik) jáne Renault (294 birlik).
Bıyl 7 aıdyń qorytyndysy boıynsha Qostanaıdaǵy «SaryarqaAvtoProm» kásiporny 179,2 mlrd teńgege 28 670 tehnıka (ósim 46,9 paıyz) óndirdi. Almatydaǵy Hyundai Trans Kazakhstan kompanııasy jalpy quny 140,7 mlrd teńge bolatyn 14 274 jeńil avtokólik shyǵardy. Semeıdegi «SemAZ» kásiporny 21,4 mlrd teńgege 2 476 kommersııalyq tehnıka (ósim 95 paıyz) qurastyrdy.
Budan bólek Kókshetaýdaǵy «KamAZ-Injınırıng» kompanııasy 824 júk kóligin (ósim 60,9 paıyz), Hyundai Trans Auto zaýyty 496 júk kóligi men avtobýs (ósim 165,2 paıyz), Daewoo Bus Kazakhstan kompanııasy 146 avtobýs shyǵardy.
Avtomobılder eksporty avtoónerkásipti damytýdyń basym baǵyty bolyp otyr. Reseı, О́zbekstan, Qyrǵyzstan jáne Belarýs memleketterine 30,6 mlrd teńgege 4 533 avtomobıl jóneltildi. Bul – ótken jylmen salystyrǵanda 27 paıyzǵa joǵary.
Qazaqstanda kólikti óndirýden bólek, eski kólikterdi joıýǵa tapsyrý da qarqyn alǵan. Derekterge súıensek, qazaqstandyqtar arnaıy baǵdarlama bastalǵan kúnnen búginge deıin 200 104 eski kólikti joıýǵa tapsyrǵan. 2021 jyldyń segiz aıynda 25 958 jeńil avtokólik, 9 219 jolaýshy jáne júk kólikteri tapsyrylǵan. Jeńildik sertıfıkaty baǵdarlamasy boıynsha 2 315 aýylsharýashylyq tehnıkasy qabyldanǵan. Onyń 1 830-y – traktor, 485-i – kombaın.
Qazaqstan boıynsha eski kólikti ótkizýde Shymkent qalasy kósh bastap tur. Atalǵan shahar turǵyndary 38 496 kólik ótkizgen. Odan keıingi orynda Almaty, Taraz, Qaraǵandy, Pavlodar qalalary jaıǵasqan.
Baǵdarlama júzege asyryla bastaǵan ýaqyttan beri 54 700 jeńildik sertıfıkaty Qazaqstanda qurastyrylǵan 29 200 kólikti satyp alýǵa paıdalynylǵan. Eski kóligin joıýǵa tapsyrǵan qazaqstandyqtarǵa berilgen ótemaqy kólemi 28 mlrd teńgeni qurap otyr.
Eske sala keteıik, eski kólikti joıýǵa qabyldaý baǵdarlamasy 2016 jyldyń qarasha aıynda iske qosyldy. Baǵdarlama suranysyna qaraı kólik qabyldaý tártibi elektrondy júıege aýystyryldy. Sonymen qatar avtokólikterge beriletin aqshalaı ótemaqy mólsheri ulǵaıtyldy. Jeńil kólikter úshin 210 myń (72 AEK), M2 jáne N1 sanatyndaǵy kólikterge 420 myń (144 AEK) jáne M3 sanattaǵy tehnıkalarǵa 630 myń (216 AEK) teńgege deıin ótemaqy belgilendi.
Budan bólek ótken jyldyń qarashasynan isten shyqqan aýyl sharýashylyǵy tehnıkasyn kádege jaratýǵa qabyldaý baǵdarlamasy iske qosyldy. Tapsyrylǵan eski kombaındar men traktorlardyń ornyna jeńildik sertıfıkattary berildi. Jeńildik sertıfıkatynyń nomınaly aýyl sharýashylyǵy tehnıkasynyń túri men jıyntyǵyna baılanysty 560 myń teńgeden 2 mln teńgege deıin baǵalandy.