Reseı prezıdenti Vladımır Pýtın Úndistan premer-mınıstri Narendra Modımen Aýǵanstandaǵy jaǵdaıdy talqylady, dep habarlaıdy Egemen.kz.
Kremldiń habarlaýynsha, Aýǵanstandaǵy jaǵdaı boıynsha pikir almasý kezinde taraptar osy elde beıbitshilik pen turaqtylyqty ornatýǵa jáne aımaqtaǵy qaýipsizdikti qamtamasyz etýge kómektesý úshin birlesken kúsh-jigerdiń mańyzyna toqtalǵan.
«Olar terrorıstik ıdeologııanyń taralýyna jáne Aýǵanstan aýmaǵynan shyǵatyn esirtki qaýpine qarsy turýda yntymaqtastyqty nyǵaıtýǵa óz kózqarastaryn bildirdi. Bul másele boıynsha turaqty konsýltasııalardyń ekijaqty arnasyn qurý týraly kelisim jasaldy», delingen habarlamada.
Taraptar Reseı men Úndistan arasyndaǵy ekijaqty qarym-qatynasty jáne koronavırýs (COVID-19) pandemııasyna qarsy kúres máselelerin de talqylady.