О́zin de, ózgeni de oılaý – ár azamattyń mindeti

Bul kúnde Jambyl oblysyn­daǵy barlyq aýrýhanalar men emhanalar kúrdeli jumys kestesine aýysty. О́ńirde qatań karantın sharalary engizildi. Osyndaı qıyn kezeńde jedel járdem qyz­meti táýlik boıy kópshiliktiń ómi­­rin saqtap qalý úshin eńbek etti. Bir kúnde jedel járdem qyz­­­metine 1800-2000 qońyraýǵa de­ıin túsken. Aımaqtaǵy aq ha­lat­ty abzal jandar syn sa­ǵatta bá­rine de úlgerip, naýqas jan­darǵa me­dı­sınalyq kómek kórsetti.

«Bizdiń stansa – Jambyl ob­lysyndaǵy úlken mekemelerdiń biri. Munda qyzmetkerler de óte kóp. Bir táýlikte oblys tur­­ǵyndaryna 93 brıgada qyz­met kórsetedi. Al 93 kólik júr­gizý­shi men 150 medısına qyz­met­keri kúndiz-túni aıaǵynan tik turyp, jany qınalǵandarǵa al­ǵashqy kómekterin kórsetip, qa­jet bolǵan jaǵdaıda aýrý­hana­lar­ǵa jetkizedi», deıdi oblys­tyq jedel járdem stansasy bas dárigeriniń orynbasary Kúl­zahıra Qyzǵaraeva.

Sońǵy táýliktiń ózine jedel járdem qyzmetine 1800-den astam qońyraý túsken. Jedel kórsetilgen kómektiń nátıjesinde 226 adam koronavırýs ınfeksııasymen juqpaly aýrýlar aýrý­hanasyna jatqyzylǵan. Qazirgi kezde óńirde 2 130 naýqas stasıonarlyq em qabyldaýda. Daıyndalǵan tósektik oryn 59 pa­ıyzǵa toltyrylǵan. Sonymen qatar jansaqtaý bólimshesinde 173 naýqas emdelýde. Aımaqtaǵy qabyldanǵan sharalardyń nátı­jesinde qaýipti indetten jazy­lyp shyqqandar da bar. Máselen, Jambyl aýdanynyń turǵyny, 62 jastaǵy azamat Ismaıl Kamalov oblystyq ońaltý ortalyǵynyń ınfeksııalyq stasıonaryna ókpeniń 56 paıyzynyń zaqym­danýymen, tynys alýdyń qıyn­dyǵymen kelip túsken. Mun­da da dárigerler atalǵan azamat­tyń ómirin saqtap qalý úshin bar­lyq qajetti sharany jasaǵan. Alaı­da naýqastyń koronavırýs indetine qarsy vaksına al­ma­ǵa­ny anyqtalǵan. Dese de, búgin­de atalǵan azamat naýqasynan aıyǵyp, úıine qaıtarylǵan. «PTR-test er adamnyń koronavırýs indetin juqtyrǵanyn kór­set­ken. Naýqastyń jaǵ­daıyn býyn aýrýy men qan qysymy­nyń joǵarylaýy odan ári qıyn­datqan. Ortalyq dárigerleriniń qamqorlyǵy men biliktiliginiń arqasynda jaǵdaıy jaqsarǵan soń, eki aptadan keıin naýqas úıine shyǵaryldy. Aýyr halde jetken naýqas aýrýhanaǵa ty­nysynyń tarylýymen túsken. Dertke shaldyqqandardy aýrýdan aıyqtyryp, úıine jetkizý – bizdiń paryz. Aǵza tolyq qalpyna kelý úshin odan ári ońaltatyn em-dom jasaý qajet. Aýrý aıtyp kelmeıdi. Úıde sımptomsyz bas­talyp, aıaq astynan órship ketýi múmkin. Sondyqtan halyq aýrýdan saqtanýǵa salǵyrt, beıjaı qaramasa eken», deıdi emdeýshi dárigeri Aqmaral Qulymbaeva.

Jambyl aýdanynyń turǵy­ny Ismaıl Kamalov ta bul kún­de jaǵdaıynyń jaqsy ekenin aıtady. Degenmen ol kúndelikti tirshilik qamyn kúıttep júrip qaýipti indetten saqtanýdy asa qaperine almaǵanyn da jetkizdi. «Aýyr naýqastan keıin úıge aman-esen oralǵanyma óte qýa­nysh­tymyn. Karantınge qaramas­tan medısınalyq betperde kımeı kóshede júrdim, arasynda bazarǵa da baratynmyn. Sodan aqyry indet juqtyryp, aýrýhanadan bir-aq shyqtym. Aýrýhanada 14 kún em qabyldadym. Dárigerler meni aıaqqa turǵyzdy. Ol kisilerge óte rızamyn. Barlyǵy da óz mindetin kásibı deńgeıde oryndap, bizge jyly shyraı tanytyp, úıdegideı kútim jasady. Ortalyqta jumys isteıtin qyzmetkerlerge kásibı biliktiligi men kórsetken kómegi úshin alǵysymdy bildiremin», deıdi ol.

Sol sııaqty qaýipti indetke shaldyqqan birqatar azamattar da naýqasynan aıyǵyp, úılerine shyǵarylǵan. Alaıda dárigerler turǵyndarǵa arqany keńge salmaı, qaýipsizdik sharalaryn qa­tań saqtaýdy mindettep otyr. Soń­ǵy táýliktiń ózinde jedel járdem qyzmetine 2 myńǵa jýyq qońyraýdyń túsýi indettiń órship bara jatqanyn kórsetedi. Al odan saqtaný, óziniń de, ózgeniń de qaýip­sizdigin oılaý árbir azamat­tyń basty mindeti bolýy kerek.

Jambyl oblysy