Ishki ister mınıstriniń tapsyrmasy boıynsha turǵyndardy evakýasııalaý men qoǵamdyq tártipti qamtamasyz etý jumystaryna Jambyl oblysy Polısııa departamentiniń 300 polıseıi men 47 avtoekıpajy, sonymen qatar Ulttyq ulannyń 520 áskerı qyzmetshisi jumyldyryldy, dep habarlaıdy Egemen.kz.
Oqıǵa ornyna aparar joldar, avtojoldar men «Taraz-Almaty» baǵytyndaǵy temirjol ýaqytsha jabylǵan. Qazirgi kezde Taraz qalasynyń mektepterine Baızaq aýdanynyń Qaınar, Botamoınaq, Jibek Joly aýyldary jáne Úshbulaq stansasynyń 1 200-ge jýyq turǵyny evakýasııalanǵan.
Jambyl oblysyndaǵy áskerı qoımadaǵy órttiń tutanýy boıynsha QR Qylmystyq kodeksiniń 462-babyna (Qarý-jaraqpen, sondaı-aq aınaladaǵylarǵa qaýip tóndiretin zattarmen jáne nárselermen jumys isteý qaǵıdalaryn buzý) sáıkes sotaldy tergeý bastaldy. Qoǵamdyq tártipti saqtaý jáne tonaýdy boldyrmaý maqsatynda evakýasııalanǵan eldi mekenderdi qorshaý jáne patrýldeý uıymdastyryldy.
Sondaı-aq, Ishki ister mınıstrligi tekserilmegen nemese kórineý jalǵan aqparatty taratýǵa jol berilmeıtini týraly eskertedi.
Jambyl oblysy ákimdiginiń málimetinshe, osy ahýalǵa baılanysty qandaı da bir týyndaǵan suraqtar úshin: - 109 telefon nómiri; - 8-778- 810-91-09 vatsap jelisi arnaıy iske qosyldy. Sonymen qatar, - 8(7262) 51-41-67 telefon nómiri arqyly jedel jelige habarlasýǵa bolady.