Konstıtýsııa kúni qarsańynda el táýelsizdiginiń 30 jyldyǵyna oraı «Egemen Qazaqstan» gazetiniń qyzmetkerlerinen jasaqtalǵan «Atameken» ekspedısııasynyń músheleri Qaraǵandy oblysyna keldi, dep habarlaıdy Egemen.kz.
Qazaq halqynyń mádenıeti men tarıhyn, aımaqtardyń týrıstik áleýetin nasıhattaý - ekspedısııa barysyndaǵy basty maqsat.
Babalar izimen kele jatqan kerýendi Qaraǵandy qalasynyń kire berisinen oblys ákimdiginiń ókilderi qarsy aldy.
«Qaraǵandy oblysy tarıhı-mádenı muraǵa baı. Biz elimizdiń bas basylymdarynyń ókilderin, otandyq BAQ kóshbasshylaryn qasıetti jerde qarsy alǵanymyzǵa qýanyshtymyz», dedi ekspedısııa qatysýshylaryn kútip alǵan oblystyq ishki saıasat basqarmasynyń basshysy Erlan Qusaıyn.
Eki kúndik ekspedısııada jýrnalıster Jańaarqa aýdany, Jezqazǵan jáne Ulytaý aýdanynda ornalasqan tarıhı kıeli nysandardy aralaıdy.