Memleket basshysy Qasym-Jomart Toqaevtyń tóraǵalyǵymen bıyl 15 naýryzda respýblıkalyq referendýmda qabyldanǵan Qazaqstan Respýblıkasynyń Konstıtýsııasyn iske asyrý máselesi jóninde jumys keńesi ótti, dep habarlaıdy Egemen.kz Aqordanyń baspasóz qyzmetine silteme jasap.
Keńeske Parlament Senatynyń Tóraǵasy Máýlen Áshimbaev, Parlament Májilisiniń Tóraǵasy Erlan Qoshanov, Premer-mınıstr Oljas Bektenov, Memlekettik keńesshi Erlan Qarın, Prezıdent Ákimshiliginiń basshysy Aıbek Dádebaı, Prezıdenttiń quqyqtyq máseleler jónindegi kómekshisi Erjan Jıenbaev jáne Ádilet mınıstri Erlan Sársembaev qatysty.
Prezıdent búgin «2026 jylǵy 15 naýryzda qabyldanǵan Qazaqstan Respýblıkasynyń Konstıtýsııasyn iske asyrý jónindegi sharalar týraly» Jarlyqqa qol qoıǵanyn atap ótti.
Memleket basshysy alda zańdar men ózge de normatıvtik-quqyqtyq aktilerdiń erejelerin jańa Konstıtýsııaǵa sáıkestendirý boıynsha aýqymdy jumys turǵanyn aıtty.
Qasym-Jomart Toqaev, eń aldymen, jańa Konstıtýsııaǵa sáıkes bılik ınstıtýttarynyń qyzmetin aıqyndaıtyn zańdardy túzeý qajettiligine nazar aýdardy.
Jalpy, alty konstıtýsııalyq zań jáne ózge zańnamalyq aktilerge ózgerister men tolyqtyrýlar engizý jóninde úsh zań qabyldaý qajet.
Konstıtýsııa kúshine enetin kúndi eskere otyryp, tıisti zańdardy Parlament sessııasy aıaqtalǵanǵa deıin qabyldaý kerek.
Memleket basshysy zańdardy sapaly ári ýaqtyly ázirlep, qabyldaýdy tapsyrdy. Sondaı-aq Úkimet zańǵa táýeldi normatıvtik-quqyqtyq aktilerdi keshiktirmeı túzeýge tıis.