О́ńirdegi oqý oryndarynyń pedagogtary oqýshylardy dástúrli formatta oqytýǵa daıyn. Bul jóninde Almaty oblysy ákiminiń orynbasary Batyrjan Baıjumanov brıfıngte aıtty, dep habarlaıdy Egemen.kz.
Aldyn ala boljam boıynsha, jańa oqý jylynda óńirdegi oqýshylar sany 440 myńǵa ósedi, al birinshi synypqa 47 myń oqýshy qabyldanady.
«Barlyq mektepter qorǵanys quraldarymen qamtamasyz etildi, osy maqsatqa jergilikti bıýdjetten 200 mıllıon teńge bólindi. Barlyq bilim berý obektileri Ashyq jobasyna qosyldy», dep atap ótti ákimniń orynbasary Batyrjan Baıjumanov Jetisy media brıfınginde.
Oblys mektepterinde halyqtyń áleýmettik osal toptarynan jáne az qamtylǵan otbasylardan shyqqan oqýshylardyń 100%-y tegin ystyq tamaqpen qamtamasyz etiledi.
«Kóp balaly jáne az qamtylǵan otbasylardan shyqqan 44 531 oqýshyny ystyq tamaqpen, mektep formasymen qamtamasyz etýge qosymsha 2,6 mıllıard teńge bólindi», dep naqtylady oblystyq bilim berý basqarmasy basshysynyń mindetin atqarýshysy Jańyl Súleımenova.
Onyń aıtýynsha, «Mektepke jol» aksııasy aıasynda 12 902 oqýshyǵa 122 mıllıon teńge kóleminde demeýshilik kómek kórsetildi. Bul baǵyttaǵy jumystar áli de jalǵasýda.
Oblysta 40 bilim berý nysanynyń, onyń ishinde 28 mekteptiń qurylysy júrgizilýde. Oqý jylynyń basynda alty jańa mektepti ashyp, jyl sońyna deıin taǵy tórt mektepti tapsyrý josparlanýda.