Aqmola oblysynda 13-17 qańtar aralyǵynda 247 aýyldyq okrýgtiń ákimi halyq aldynda esep berdi. Biz Qorǵaljyn aýdanyndaǵy Qaraegin aýyly turǵyndarynyń jınalysyna qatysqan edik. Bul jóninde Sabyndy aýyldyq okrýginiń ákimi Gúlbaný Smaǵulova aýyl ómirine jan-jaqty taldaý jasap, tabystardy atap kórsetti.
Aqmola oblysynda 13-17 qańtar aralyǵynda 247 aýyldyq okrýgtiń ákimi halyq aldynda esep berdi. Biz Qorǵaljyn aýdanyndaǵy Qaraegin aýyly turǵyndarynyń jınalysyna qatysqan edik. Bul jóninde Sabyndy aýyldyq okrýginiń ákimi Gúlbaný Smaǵulova aýyl ómirine jan-jaqty taldaý jasap, tabystardy atap kórsetti.
Aýylda alty sharýashylyq qurylymy jumys isteıdi. Osyǵan baılanysty jerge suranys ta arta túsken. Byltyr 10590 gektarǵa (1500 gektarǵa kóp) dándi daqyldar sebilip, ár aınalymnan orta eseppen 15 sentnerden ónim alyndy. Bul oraıda tehnıka quramyn 70 paıyzǵa jańartqan «Jańa» seriktestiginiń basshysy Marat Qasenovtiń úlgisi bólektep kórsetildi.
Aýylda mal basynyń ósýine «Bıznestiń jol kartasy-2020» baǵdarlamasy eleýli septik jasaǵan. Osyǵan qatysty, minberge kóterilgen «Qydyrbaı» sharýa qojalyǵynyń basshysy Nurbaı Ábdirahmanov «Sybaǵa» baǵdarlamasy aıasynda 8 mıllıon 550 myń teńge nesıe alyp, iri qara tabynyn 58 bas malmen tolyqtyrǵanyn aıtty. Qazir qojalyq qaramaǵynda 100 bas iri qara, 22 jylqy, 25 qoı bar. Sondaı-aq, ujym kóktemgi egis naýqanynda Aýyl sharýashylyǵyn qarjylaı qoldaý qorynan 3 mıllıon teńge nesıe alyp, jemisin kórip otyr.
«Aq bulaq» baǵdarlamasy 409 turǵyny bar qaraegindikterdi aıryqsha qýanyshqa bólegeni baıandamany talqylaýshylardyń sózinde atalyp ótti. Respýblıkalyq bıýdjetten 62 mıllıon 700 myń teńge qarjy bólinip, aýyl ishindegi 6 shaqyrym sý taratý jelilerine kúrdeli jóndeý jumystary júrgizilipti. Aýyz sýǵa tapshylyq tolyq joıylǵan. Aýyl da kóriktenip qalǵan. Esepti kezeńde 400 tonna kóń-qoqys shyǵarylyp, qyrýar kóriktendirý jumystary júrgizildi. Kóshelerdi qalypqa keltirýmen qatar, elektr shamdary da ornatylǵan. Qar tazalaý, jol ashý jumystary da sharýashylyq qurylymdarynyń kúshimen atqarylýda. Aýylda orta mektep, «Aıgólek» shaǵyn ortalyǵy jumys isteıdi. «Jańa» JShS basshysy Marat Qasenovtiń bastamasymen Aýǵan soǵysynda qaza tapqan jerles jaýyngerlerge eńseli eskertkish turǵyzylýy da ıgilikti is dep bilemiz.
Qaraeginde eki jyl ishinde jeke menshik 8 úıdiń boı kóterýi aýyl tirshiliginiń jaqsarǵanyn baıqatady. Ony jumys oryndarynyń kóbeıýimen, jergilikti bıýdjetke aýdarylatyn salyq qarajatynyń óskendigimen baılanystyrýǵa bolady. Osy rette D.Qasenovtiń sharýashylyq quramynda 150 bas sıyrǵa arnalǵan zamanalyq ferma salý josparyna úlken úmit artylyp otyrǵandyǵy alǵa tartyldy. Atalǵan sharýashylyq 150-den astam jylqy, 50-diń ústinde iri qara mal ósiredi eken. Byltyr munda 50 tonna sút, 15 tonna qymyz óndirilip, aýdan ortalyǵynda, Astana qalasynda joǵary suranyspen satylǵan. Jańa ferma iske qosylǵan jaǵdaıda ónim kólemin jylyna 700 tonnaǵa jetkizip, qosymsha jumys oryndaryn ashýǵa múmkindik týmaq. Bul úshin memleket tarapynan qarjylaı qoldaý kerek. Jınalysqa qatysqan aýdan basshylyǵy bıznes-jospardyń maquldanǵanyn, tıisti oryndardyń qaraýyna joldanǵanyn aıtty.
Baqbergen AMALBEK,
«Egemen Qazaqstan».
Aqmola oblysy,
Qorǵaljyn aýdany.