Aqtóbede aýla aýmaqtaryn abattandyrýdyń aýqymdy jumystary júrgizilýde. Bıyl barlyǵy 220 aýla jóndeledi. Jýyrda oblys ákimi Ońdasyn Orazalın jóndeý jumystarynyń barysymen tanysyp, 5, 8 jáne 11-shaǵyn aýdandar men Sh.Qaldaıaqov kóshesiniń aýlalaryn qarap shyqty. Merdiger mekemelerdiń basshylary jobalardyń júzege asyrylýy jaıly esep berdi.
«Eset batyr men Sh.Qaldaıaqov kósheleriniń qıylysynan Abaı dańǵylyna deıingi alańda ornalasqan kópqabatty úılerdiń barlyq aýlalarynda jóndeý jumystaryn júrgizemiz. Sondaı-aq, 8-shaǵyn aýdanda da nysandar bar. Alty aýlany aıaqtap qaldyq. PIK-tiń, turǵyndardyń qalaýyn bilý úshin aldyn ala, jumys bastalǵanǵa deıin olarmen keńesemiz. Bir jerin keńeıtýdi, bir jerin alyp tastaýdy surap jatady. Sonyń bárin eskerip, tapsyrys berýshimen kelisemiz. Turǵyndar tarapynan eshqandaı narazylyq bolǵan joq, kerisinshe olar rızashylyqtaryn bildiredi», deıdi «Aqtóbe adal qurylys» JShS dırektory Ahmetbek Súleımenov.
Abattandyrý kezinde aýla- lardyń asfaltbeton jabyndylary almastyrylyp, aýlaǵa kiretin joldarǵa asfalt tóselip, kólik turatyn aýmaq jasalady.
«О́tkende sizder munda bolǵansyzdar, balalar alańy, asfalt bolady dep ýáde bergen edińizder. Bir aıǵa jetpeı ýáde oryndaldy. Turǵyndar rıza. Sózińizge senýge bolady eken. Rahmet!», dedi aýlasy jóndelgen turǵyndardyń biri alǵysyn aıtyp.
Al oblys ákimi jańartylǵan keńistikke uqypty qarap, aýla men úıdiń kire berisin taza ustaýǵa shaqyrdy.
11-shaǵyn aýdanda jóndelip jatqan aýlalardyń biriniń turǵyndary balalar alańyn ornatýdy surady, O.Orazalın ótinishteri bıyl oryndalatynyna sendirdi. Osy jyly qaladaǵy kóp- qabatty úılerdiń aýlalarynda barlyǵy 67 balalar oıyn alańy ornatylmaq. Qalany qyzmet babymen aralaý Áýe qalashyǵy shaǵyn aýdanyndaǵy «Aq jelken» aýla klýbynda jalǵasty. Munda balalar bımen, radıotehnıkamen aınalysyp, mýzykalyq aspapta oınaı alady, 3D modeldeýdi jáne t.b. úırenedi.
Aýla klýby ashylysymen Áýe qalashyǵynyń, sonymen qatar soǵan jaqyn jatqan aýdandardyń turǵyndary balalaryn úıdiń qasyndaǵy úıirmelerge apara alatyn bolady.
«Árbir ata-ana balasynyń jan-jaqty damyǵanyn qalaıdy. Degenmen balany qalanyń basqa bóligindegi úıirmeler men seksııalarǵa aparý qolaısyz. Biz muny túsinemiz. Sondyqtan qala turǵyndaryna yńǵaıly bolý úshin qosymsha bilim berý júıesin múmkindiginshe búkil qala boıynsha ornalastyrý mindetin qoıdyq. Osyndaı mindetti Nur-Aqtóbege de qoıyp otyrmyz, ol jaqta jańa ǵımarat salynatyn bolady. Al bul jerde ǵımaratyn qaıtarymsyz berip otyrǵan áýejaıǵa alǵys aıtý kerek. Biz sony jóndep, aýla klýbyna laıyqtadyq», dedi Áýe qalashyǵy turǵyndaryna oblys ákimi.
Ol sondaı-aq, jaryq úılerdi jóndeý, qasbetin syrlaý jáne t.b. syndy Áýe qalashyǵyn abattandyrý jumystary bas- talatynyn jetkizdi. «Aýla klýbynyń ashylǵanyna sheksiz rızamyz, bizge osyndaı oryn rasymen qajet bolatyn. Endi biz balalarymyzdy paıdaly ispen shuǵyldandyra alamyz. Aýdanymyzǵa abattandyrý jumystary da kerek. Tek qalanyń ortalyǵyna ǵana kóńil bólinip jatpaǵany súısindiredi», dedi Áýe qalashyǵy turǵyny Anna Petrovna.
Oblys ákimi jumys saparynyń sońynda Aqtóbe qalasyndaǵy áýejaıdyń burynǵy qonaqúı ǵımaratynyń jóndeý jumystarymen tanysty. Nysan Aqtóbe oblysynyń qorǵanys isteri jónindegi departamentine áskerge shaqyrýshylar beketin uıymdastyrý úshin berilgen.
«Egemen-aqparat»