QR Qarjy mınıstrligi múddeli memlekettik organdarmen birlesip kóleńkeli ekonomıkaǵa qarsy is-qımyl jónindegi is-sharalar josparyn iske asyrýda. Bul týraly QR Premer-Mınıstri Asqar Mamınniń tóraǵalyǵymen ótken Úkimet otyrysynda qarjy mınıstri Erulan Jamaýbaev málimdedi, dep jazady Egemen.kz.
2021-2022 jyldarǵa arnalǵan bıýdjet kiristerin ulǵaıtý úshin birneshe shara josparlandy. Atap aıtqanda, memleket shekarasyndaǵy kóleńkeli ekonomıkaǵa jáne zańsyz saýda aınalymyna qarsy is-qımyl jónindegi is-sharalar josparyn iske asyrý, taýarlardy qadaǵalaýdyń ulttyq júıesin jetildirý, sıfrlyq sheshimderdi engize otyryp, keden ınfraqurylymyn jańǵyrtý, iri bıznestiń kóldeneń monıtorıngi boıynsha pılotty keńeıtý, sheteldik salyq ákimshilikterimen ózara is-qımyldy kúsheıtý jáne transferttik baǵa belgileý týraly zańnamany jetildirý, mıkro jáne shaǵyn bıznestiń josyqsyz sýbektileri boıynsha tekserýler júrgizýge moratorııdiń kúshin joıý máselesin qaraý.
Memlekettik jáne kvazımemlekettik boryshty basqarý jónindegi tujyrymdamany ázirleý týraly tapsyrma sheńberinde is-sharalar memlekettik organdar júrgizip jatqan jumysty eskere otyryp úılestiriletin bolady.
Tujyrymdamanyń negizgi tásilderi retinde memlekettik boryshtyń ósýin shekteý jáne ony qaýipsiz deńgeıde ustap turý úshin bıýdjet tapshylyǵyn kezeń-kezeńimen tómendetý, borysh turaqtylyǵynyń negizgi kórsetkishterin belgileý, barynsha ekonomıkalyq tıimdilikke qol jetkizý úshin jobalardy egjeı-tegjeıli irikteý atap ótildi.
Mınıstrlik Jekeshelendirýdiń 2021-2025 jyldarǵa arnalǵan keshendi josparynyń ýaqytyly oryndalýyna baqylaýdy kúsheıtti. Ol úshin obektilerdi ótkizý tásilderi ázirlendi. Oǵan sáıkes obektilerdiń 50%-y bıyl, 30%-y 2022 jyly jáne 10%-y 2023 jáne 2024 jyldary satýǵa qoıylýy tıis.
Budan basqa, Keshendi jospardyń árbir obektisi boıynsha ótkizý jol kartalary ázirlendi jáne memlekettik múlik tizilimine engizildi. О́z kezeginde, jekeshelendirý josparynyń iske asyrylýyna jaýapkershilikti kúsheıtý maqsatynda, ákimdikterdiń, ulttyq basqarýshy holdıngter men kompanııalardyń qyzmetin baǵalaý kezinde onyń oryndalýyn eskerý usynylady. Jalpy, usynylyp otyrǵan sharalar 2025 jyldyń sońyna qaraı memlekettiń ekonomıkaǵa qatysý úlesin jalpy ishki ónimniń 14%-na deıin qysqartýǵa múmkindik beredi.
«Sonymen qatar kvazımemlekettik sektor kompanııalarynyń birinshi basshylarynyń jaýapkershiligin normatıvtik turǵydan qarastyrý usynylady. Jaýapkershilik damý josparlarynda strategııalyq kórsetkishterge qol jetkizbegeni úshin, onyń ishinde kvazımemlekettik kompanııalardyń shyǵynǵa ushyraýyna jol bergeni úshin qarastyrylatyn bolady», dedi qarjy mınıstri.
Memlekettik josparlaýdyń aqparattyq júıesin damytý jumysy jalǵasady. Joba sheńberinde «Memlekettik ınvestısııalyq jobalar» modýli iske asyrylady, ol memlekettik ınvestısııalyq jobalardyń qujattamasyn qalyptastyrýǵa jáne memlekettik organdarmen kelisýge arnalǵan.
Memlekettik satyp alý josparlaryn avtomatty túrde qalyptastyrý úshin memlekettik josparlaýdyń aqparattyq júıesin memlekettik satyp alý portalymen ıntegrasııalaý iske asyrylatyn bolady.
Budan basqa, memlekettik satyp alýdyń derekteri boıynsha tómen baǵalardy anyqtaý jáne shyǵyndar normatıvteriniń anyqtamalyǵyn ótkizý josparlanýda. Osy derekterdiń negizinde júıede formattyq-logıkalyq baqylaýdy ornatý josparlanýda.
Bıýdjet baǵdarlamalarynyń ákimshileri bıýdjet qarajatyn tıimdi josparlaýy men paıdalanýy úshin «Memlekettik qoldaý sharalary tıimdiliginiń monıtorıngi» júıesiniń nátıjelerin paıdalanýy qajet.
Qarjy mınıstrliginde memlekettik shyǵystardyń kólemi men tıimdiligin baqylaýdyń neǵurlym pármendi tetikteriniń biri jedel bıýdjettik monıtorıngti qamtamasyz etý dep tujyrymdaıdy. Ol strategııalyq jáne baǵdarlamalyq qujattarda kózdelgen tikeleı jáne túpkilikti nátıjege qol jetkizýge baǵyttalǵan. Bul buzýshylyqtarǵa jol bermeýmen qosa basqarýshylyq sheshimderdi ýaqytyly qabyldaýǵa múmkindik beredi.
«Halyqtyń memlekettik qarjyny basqarý men baqylaýǵa qatysýyn keńeıtý úshin normatıvtik quqyqtyq aktilerge tıisti túzetýler engiziletin bolady. Bul abattandyrý jáne turǵyn úı-kommýnaldyq sharýashylyq bıýdjetindegi «halyqtyń qatysý» úlesin 10 esege arttyrýǵa múmkindik beredi», dedi E. Jamaýbaev.
«О́z kezeginde, halyqty bıýdjettik sheshimder qabyldaý prosesine tartý prosestiń ashyqtyǵyn qamtamasyz etedi, azamattardyń jergilikti bılikke senimin nyǵaıtady, halyqtyń qarjylyq saýattylyǵyn arttyrady, ınfraqurylym obektileriniń sapasy men uqypty paıdalanylýy úshin ortaq jaýapkershilikti qamtamasyz etedi», dep jazady Premer-Mınıstrdiń baspasóz qyzmeti.
Prezıdent Joldaýynyń is-sharalaryn iske asyrýǵa arnalǵan qajetti qarajattar bıýdjettik baǵdarlamalar ákimshilerimen birlesip pysyqtalatyn bolady.