Búgin Premer-Mınıstrdiń orynbasary Eraly Toǵjanovtyń tóraǵalyǵymen memlekettik organdardyń basshylary jáne elimizdiń jetekshi ǵalymdarynyń qatysýymen bıologııalyq qaýipsizdik máseleleri jónindegi keńes otyrysy ótti, dep jazady Egemen.kz.
Keńeste elimizdiń bıoqaýipsizdigin qamtamasyz etý máseleleri boıynsha Memleket basshysynyń Qazaqstan halqyna Joldaýynda qoıylǵan mindetter talqylandy.
Sondaı-aq «Nazarbaev Ýnıversıteti» DBBU, «Infeksııaǵa qarsy preparattar ǵylymı ortalyǵy» AQ, «Fıtohımııa» holdıngi, «D.V.Sokolskıı atyndaǵy otyn, katalız jáne elektrohımııa ınstıtýty» AQ, «Mıkrobıologııa jáne vırýsologııa ǵylymı-óndiristik ortalyǵy» JShS jáne t. b. ortalyqtar júrgizip jatqan COVID-19-ǵa qarsy otandyq dárilik zattardy ázirleý máselesi talqylandy.
Keńes otyrysynyń qorytyndysy boıynsha E.Toǵjanov birqatar tapsyrma berdi: epıdemıologııalyq syn-tegeýrinderge qarsy qaýipsizdikti qamtamasyz etý salasynda ǵylymı-zertteý jáne ınnovasııalyq qyzmettiń tıimdiligin kúsheıtý jóninde usynystar ázirleý jónindegi jumys tobyn qurý; ǵylymı-zertteý jáne ınnovasııalyq jumystardy iske asyrý jónindegi keshendi jospar ázirleý; epıdemıologııalyq qaýipsizdikti qamtamasyz etýge jáne ınfeksııalyq aýrýlarǵa qarsy dárilik preparattardyń jańa túrlerin ázirleýge baǵyttalǵan ǵylymı jáne ınnovasııalyq jobalardy nysanaly qarjylandyrýdy qamtamasyz etý jóninde usynystar engizý; bıologııalyq qaýipsizdik salasyndaǵy otandyq ǵylymı ınstıtýttardyń ǵylymı-kadrlyq, materıaldyq-tehnıkalyq áleýetin damytý jónindegi naqty usynystardy taldaý jáne engizý.