Almaty turǵyndarynyń áleýmettik osal toptaryn qoldaýǵa bıýdjetten 30 mlrd-tan astam teńge bólinip, qazirgi kezde onyń 14 mlrd teńgesi ıgi maqsatqa jumsalǵan. Jyl basynan bergi aralyqta 132 myń almatylyq áleýmettik qoldaýǵa ıe bolǵan.
Qalalyq Áleýmettik ál-aýqat basqarmasynyń basshysy Nazıra Toǵyzbaeva О́ńirlik kommýnıkasııalar qyzmetiniń baspasóz konferensııasynda osy baǵytta atqarylǵan jumystardyń «Eńbek» memlekettik baǵdarlamasy aıasynda kórsetilip jatqanyn, osy oraıda az qamtylǵan azamattarǵa, múgedekterge qoldaý kórsetilgenin atap ótti.
Al jyl sońyna deıin «Eńbek» baǵdarlamasy aıasynda 13,8 mlrd bólinip, bul qarajat 24 myńnan astam adamdy qoldaýǵa jumsalatyn bolady. N.Toǵyzbaeva atap ótkendeı, osy jyldyń 7 aıynda 55 myń adam áleýmettik tólemniń 17 túrimen qamtyldy. Ataýly áleýmettik kómek otbasynyń ár múshesine shaqqandaǵy tabys eń tómengi kúnkóris deńgeıiniń 70 paıyzynan (27 112 teńge) aspaıtyn otbasylarǵa tólenedi. Ataýly áleýmettik kómek kópbalaly otbasylarǵa, jalaqysy tómen jumys isteıtin azamattarǵa, zeınetkerlerge, múgedekterge jáne basqa da muqtaj jandarǵa qaraıtyn otbasylarǵa beriledi. AÁK mindeti – jumysqa ornalasý jáne qıyn ómirlik jaǵdaıdan shyǵý. Sondyqtan olar jumyspen qamtý ortalyǵyna jiberiledi, bul olardyń materıaldyq jaǵdaıyn jaqsartýǵa múmkindik beredi. Osy jyldyń 7 aıynda Almaty qalasynyń 22,7 myń az qamtylǵan azamattaryna 1,1 mlrd teńge kóleminde kómek kórsetildi. Vedomstvo basshysynyń dereginshe, ótken jyldan bastap 1 jastan 6 jasqa deıingi balalary bar AÁK alýshylarǵa gıgıenalyq quraldar, turmystyq hımııa men balalar taǵamdary kiretin kepildendirilgen áleýmettik paket beriledi. Joba Magnum saýda jelileri arqyly júzege asady. Kelisimshart somasy 8 656 balany qamtamasyz etý úshin 607 mln teńgeni quraıdy. Búginde 5,5 myń bala qamtamasyz etilgen. Sonymen qatar AÁK alýshylaryna teledıdar men gaz jabdyqtary beriledi. Taǵy 27 myń adamǵa 1,8 mlrd teńgege áleýmettik tólemniń basqa túrleri usynylady.
N.Toǵyzbaevanyń aıtýynsha, osy jyldyń jeti aıynda Jumyspen qamtý ortalyǵyna 27 myń adamnan ótinish túsken. Qazirgi kezde jumysqa ornalastyrý josparlanǵan 19 700 adamnyń 17 900-i eńbekpen qamtylyp otyr. Olardyń qatarynda 8 700 adam turaqty jumyspen qamtylǵandar, 9 200-i ýaqytsha ornalasqan. Qazirgi kezde áleýmettik jumys oryndarynda 1 100 adam jumys istese, 1 500 úmitker jastar praktıkasyna jiberildi. Bilim berý uıymdarynyń suranysyna oraı taǵy 800 túlekti jumysqa ornalastyrý josparlanýda. Qoǵamdyq jumystarda 6 600 adam eńbek etýde.
Qala turǵyndarynyń jańa mamandyqtardy ıgerý máselesin qozǵaǵan N.Toǵyzbaeva «Qysqa merzimdi kýrstar biliktiligin joǵaltqan nemese mamandyǵyn ózgertkisi keletinderge arnalǵan. Almatynyń 34 oqý ornynda 41 mamandyq boıynsha 1 myńnan astam adam bilim alýda», dedi. Sonymen birge eńbek naryǵynda jas túlekterdiń básekege qabilettilik deńgeıi tómen ekendigine erekshe nazar aýdarǵan basqarma basshysy qalada jastarǵa qajetti jumys daǵdylaryn alýǵa jáne jumysqa beıimdelýge kómektesýge baǵyttalǵan birinshi jumys jobasy iske qosylǵanyn jetkizdi. Joba aıasynda jumysqa ornalastyrý josparlanǵan 212 adamnyń 116-sy jumyspen qamtylǵan. Aıta keterligi, qala turǵyndary men ótinish berýshiler jumysqa ornalasý úshin Almaty qalasynyń jumyspen qamtý ortalyǵyna habarlasa alady. Sondaı-aq enbek.kz elektrondy eńbek bırjasy portalyndaǵy bos oryndar tizimimen tanysa alady. N.Toǵyzbaeva sonymen birge osy jyly 757 almatylyqtyń 200 aılyq eseptik kórsetkish kóleminde grantqa, ıaǵnı óz bıznesin júzege asyrýǵa 583 myń teńgege ıe bolǵanyn jetkizdi. Kásipker bolǵysy keletinder úshin negizinen tigin, aspazdyq, manıkıýr, shashtaraz jáne basqa da qyzmetter boıynsha jeke isterin ashý múmkindigi bar.
Al jyl basynan bergi aralyqta 127 867 otbasyna qaıyrymdylyq kómek kórsetilgen. Olarǵa kıim, aıaq kıim, turmystyq tehnıka, ystyq tamaq, múgedek arbalary, sport klýbtaryna jazylý jáne taǵy basqalar berildi. Basqarma basshysy osy oraıda muqtaj jandarǵa kómek kórsetkeni úshin almatylyq kásiporyndar men uıymdarǵa alǵysyn bildirdi.
ALMATY