Qazaqstan fýtbol federasııasy fýtzal departamentiniń dırektory Asqar Ábildaev pen QFF halyqaralyq departamenti dırektorynyń orynbasary Ýálıhan Baıtaqov Reseıdiń shaǵyn fýtbol qaýymdastyǵyna jumys saparymen bardy, dep habarlaıdy Egemen.kz.
Reseıdiń shaǵyn fýtbol qaýymdastyǵynyń prezıdenti Emıl Alıev qonaqtardy jańa keńse jáne ulttyq shaǵyn fýtbol tarıhy murajaıynyń ekspozısııasymen tanystyrdy.
Kezdesýde taraptar kóptegen jyldar boıy jalǵasyp kele jatqan yntymaqtastyqty damytý máselelerin talqylap, halyqaralyq jarystar uıymdastyrý, ishki chempıonat jáne ulttyq qurama komandalarynyń ózara tájirıbe almasý joldaryna toqtaldy.
- Reseı men Qazaqstan arasynda fýtzaldan eski ári senimdi qarym-qatynas qalyptasqan. Búgin Reseıdiń shaǵyn fýtbol qaýymdastyǵyna alǵash ret keldim. Kezdesýde Reseıdiń aýqymdy jarystardy ótkizý tájirıbesin talqyladyq. Olardyń arasynda jastar, balalar, buqaralyq fýtzal bar. «Jasóspirimder lıgasy», «Shaǵyn fýtbol - mektepke», «Shaǵyn fýtbol - joǵary oqý oryndaryna» jáne basqa jobalardyń qalaı uıymdastyrylǵanyn bilý qyzyqty boldy, – dedi Qazaqstan fýtbol federasııasynyń fýtzal departamentiniń dırektory, Asqar Ábildaev.