Krasnodarda voleıboldan ardagerler arasynda Reseıdiń ashyq birinshiligi aıaqtaldy. Aıtýly jarysta Qazaq ulttyq Agrarlyq zertteý ýnıversıteti (QazUAZÝ) negizinde jasaqtalǵan «Almaty» klýby tabysty óner kórsetip, kúmis medaldi ıelendi.
50 jastan asqan voleıbolshylar saıysyna barlyǵy 21 komanda qatysty. Jerlesterimiz E tobynda óner kórsetip, birinshi oryndy ıelendi. Bul rette bizdiń komanda jergilikti «Ermak», Ýdmýrtııanyń «Votkınsk» jáne Máskeýdiń «Rýs» klýbtaryn oısyrata utty. Shırek fınalda «Almaty» Qıyr Shyǵystan kelgen «Habarovskini» qapy qaldyrdy. Bul oıyndardyń barlyǵynda 2:0 esebi tirkeldi. Jartylaı fınalda Krasnodardyń «Otdýshınasymen» kezdestik. Jergilikti jankúıerler óz komandasyna barynsha qoldaý kórsetkenine qaramastan qazaqstandyq oıynshylar bul joly da sheberliktiń shynaıy úlgisin kórsetip, 2:1 esebimen jeńisti qarsylasynyń ýysynan julyp áketti.
Fınaldyq saıysta «Almatynyń» joly Reseıdiń birneshe dúrkin chempıony, kóptegen halyqaralyq jarystardyń jeńimpazy degen ataǵy bar, kil myqtylardan jasaqtalǵan «Kostromamen» qıysty. Dáp osy klýbty bıyl jerlesterimiz Sankt-Peterbýrgte ótken týrnırde jeńgen bolatyn. Biraq bul joly Volga ózeniniń jaǵalaýynan kelgen oıynshylardyń mereıi ústem boldy. Esep – 2:0. Osylaısha, «Almaty» Krasnodar ólkesi saparynan kúmis medalmen oraldy.
– «Almaty» klýby ardagerler arasynda ótetin kóptegen týrnırde óner kórsetip, ár kez eleýli tabystarǵa qol jetkizip júrgenin ózderińiz de jaqsy bilesizder. Bul joly Reseıdiń ashyq birinshiliginde bas júlde buıyrmaǵanymen, kúmis medaldi qorjynǵa saldyq. Aıtýly memlekettiń ár óńirinen kelgen sheber oıynshylar jınalǵan jarysta ekinshi oryn alýdyń ózi – keremet kórsetkish. Sóz oraıy kelgende, bizdiń esh alańsyz jattyǵyp, dúbirli dodalarǵa esh kedergisiz qatysýymyzǵa barynsha jaǵdaı jasap, únemi qoldaý kórsetip júrgen QazUAZÝ-dyń rektory Tilektes Espolov myrzaǵa zor alǵysymyzdy bildiremiz, – deıdi «Almaty» klýbynyń kapıtany Igor Chekrýskov.